Ֆրանսիայի «Ազգային ճակատ» կուսակցության գործադիր բյուրոն, որը կատարում է կարգապահական հանձնաժողովի ֆունկցիա, որոշում չի կայացրել կուսակցության պատվավոր նախագահ և նրա հիմնադիր Ժան-Մարի Լե Պենի գործով, հայտնում է TASS-ը:
Քաղաքական գործիչը, որի 87 տարին արդեն լրացել է, Երկրորդ համաշխարհային պատերազմի վերաբերյալ իր արտահայտության համար կանչվել է բյուրոյի նիստին: Մասնավորապես, Լե Պենը ասել է, որ գազային խցիկները «ավելին չեն, քան պատմության մի մասը»: Ժողովի ավարտին Լե Պենը հայտարարել է, որ իրենք ուղղակի կարծիքներ են փոխանակել, և ինքը մտադիր չէ զիջելու իր դիրքերը: Նա ընդգծել է, որ հանդես է գալիս «Ազգային ճակատ»-ի միասնության օգտին:
Ժան Մարի Լե Պենը մի անգամ չէ, որ Երկրորդ համաշխարհային պատերազմի վերաբերյալ իր արտահայտության համար գտնվել է հետաքննության մեջ: Նրան բազմիցս տուգանել են և նշանակել պատժաժամկետներ: Վերջին անգամ նրան տուգանել են 10000 եվրո և դատել 3 ամսվա պայմանական բանտարկության Ֆրանսիայի տարածքում «գերմանացի օկուպանտների կողմից կատարված հանցագործությունների չափերի նվազեցման փորձի համար»:
