Եվրոպայում հակահրթիռային համակարգերի պաշտպանության ստեղծման նախագծում մտցված փոփոխությունները, որոնք նախատեսում են Լեհաստանում հավելյալ տեսակի՝ SM-3 IIB հակահրթիռի տեղակայումից հրաժարում, կապված չեն Ռուսաստանի դիրքորոշման հետ՝ հայտնել է ԱՄՆ ՊՆ ներկայացուցիչ Ջորջ Լիթլը: Այս մասին հաղորդում է RIA Novosti-ն:
ՀՀՊ նախագծում իրականացվելիք փոփոխությունների մասին օրերս հայտարարել էր Պենտագոնի ղեկավար Չակ Հեյգելը:
Համաձայն նրա հայտարարության՝ ԱՄՆ-ն անցկացնում է SM-3 IIB հակահրթիռների տեղակայման նախագծի վերակազմավորում: Այն նախատեսված էր Եվրոպայում ՀՀՊ համակարգի փուլային պլանի իրագործման համար, սակայն դրա կյանքի կոչումը բյուջետային ֆինանսավորման կրճատումների պատճառով հետաձգվում է առնվազն մինչև 2022 թվականը:
Մոսկվան դեմ է Եվրոպայում հակահրթիռների տեղակայման ծրագրին և բազմիցս նշել է, որ ամերիկյան ԵվրոՀՀՊ-ն մեծ արգելապատնեշ է միջուկային զենքի կրճատմանն ուղղված համատեղ աշխատանքում:
Ամերիկյան կողմը հասկացնել է տվել, որ ԱՄՆ-ը ցանկանում է Եվրոպայում հակահրթիռային պաշտպանություն ապահովել: «Մենք, ինչպես նախկինում, լիովին հավատարիմ ենք ԵվրոՀՀՊ-ին. դա ոչ թե Ռուսաստանի, այլ Իրանի պատճառով է»,- ԱՄՆ նախագահի վարչակազմի անանուն բարձրաստիճան պատոնյայի խոսքերն է մեջբերում The New York Times-ը:
