ԱՄՆ նախագահ Բարաք Օբաման հաղորդել է, որ Իսրայել և պաղեստինյան տարածքներ նախատեսված այցի նպատակն այն է, որպեսզի լսի հակամարտող կողմերին և փորձի հասկանալ՝ ինչպես վերբեռնել մերձավորարևելյան խաղաղ գործընթացը: Այս մասին հաղորդում է RIA Novosti-ն:
Իսրայելական հեռուստատեսությանը տված հարցազրույցի ժամանակ Օբաման, ըստ էության, խոստովանել է, որ տարածաշրջան է գնում առանց պատրաստի ծրագրերի և որոշումների:
«Այս շրջագայության իմ նպատակն այն է, որպեսզի լսեմ: Ես պատրաստվում եմ հանդիպել Բիբիի (Իսրայելի վարչապետ Բենիամին Նեթանյահու-1inam), Իսրայելի այլ քաղաքական առաջնորդների հետ: Ես մտադիր եմ հանդիպել Ֆայադի (Պաղեստինի վարչապետ Սալամ Ֆայադ-1in.am) և Աբու Մազենի հետ (Պաղեստինի ինքնավարության ղեկավար Մահմուդ Աբաս-1in.am): Ես ցանկանում եմ լսել, թե ինչպիսին է նրանց ռազմավարությունը, ինչպիսին է նրանց տեսությունը, նրանց կարծիքով՝ ուր է անհրաժեշտ շարժվել»,- ասել է Օբաման:
Նա կողմերին խորհուրդ է տվել ճանաչել միմյանց օրինական շահերը: Օբաման պատրաստվում է զգուշացնել Աբասին խուսափել միակողմանի գործողություններից, իսկ Նեթանյահուին խորհուրդ է տալու ամրապնդել չափավոր ուժերը պաղեստինյան ղեկավարությունում, այդ թվում՝ կատարել բնակեցման քաղաքականության հնարավոր շտկում, որն ընկալվում է որպես խաղաղ գործընթացի վերսկսման հիմնական խոչընդոտ:
«Կարծում եմ՝ մենք արդեն անցել ենք այն կետը, երբ իմաստ կար խոսել նախնական պայմանների, քայլերի և գործողությունների հետևողականության մասին»,- ասել է Օբաման:
