Ճարտարապետ, Երևանի ավագանու անդամ Լևոն Իգիթյանը ասուլիսից առաջ լրագրողներին զգուշացրեց պրովոկացիոն հարցեր չտալ, այլապես ինքը կվիրավորի, քանի որ, նրա խոսքով՝ «ձեր անձը գերագնահատում եք, իմ անձը՝ թերագնահատում»:
Նա այն կարծիքին չէ, որ Երևանի ավագանու ընտրություններում ամեն ինչ կանխորոշված է. ոչ մի բան կանխորոշված չէ, որովհետև մեր կյանքը ցույց է տալիս, որ ինչ-որ բան ծրագրելուց հետո օրվա ընթացքում ամեն ինչ փոխվում է:
«Ասում են՝ պայքարել. ի՞նչ է, մեզ մոտ պատերա՞զմ է: Թամաշան ինչի՞ համար է: Մի բան գիտեմ, որ ես մեծացել և որպես մարդ ձևավորվել եմ այս քաղաքում, և այս քաղաքի ազդեցությունը ինձ վրա շատ մեծ է: Ես Երևանի բոլոր գաղտնիքները գիտեմ, գիտեմ բոլոր չգրված օրենքները, որոնք գնալով նվազում են»,- ասաց Լևոն Իգիթյանը:
Նրա խոսքով՝ Երևանը ամենադեմոկրատ քաղաքն է, բայց դեմոկրատիայի մասին ոչ ոք չէր խոսում, ամեն մարդ իր տեղն ու չափը գիտեր, դրա համար քաղաքում բացարձակ հարմոնիա էր: Այս քաղաքում բոլորն իրար սիրում էին, ավելին՝ ասում էին, որ այս քաղաքում արվեստագետներ և գիտնականներ էին ապրում: Իհարկե, այդպես չէր, բայց ամեն մարդ իր տեղը գիտեր, իսկ արվեստի մասին չէր խոսում այն մարդը, ով արվեստ վայելող է, ստեղծող չէ, իսկ այսօր, ըստ նրա, մոռացել են, որ արվեստը վտանգավոր բան է:
«Եթե սրա անունը պայքար է, թող պայքար լինի, երբ ասում են՝ կռվել, պայքարել, ես մտածում եմ՝ թուրքերը գալիս են: Իսկ մեր քաղաքում ով ո՞ւմ է թշնամի, պետք է լինի տեսակետների բախում, ոչ թե անձերի»,- ասաց նա:
Ճարտարապետը ավագանու անդամ է դարձել, քանի որ կարծել է՝ կարող է քաղաքին օգտակար լինել. «Ես գնացի, և որ կուսակցությունն էլ կանչեր՝ կգնայի, բացառությամբ մեկի»,- ասաց Լևոն Իգիթյանը՝ այդպես էլ չնշելով, թե որ կուսակցության հրավերի դեպքում ինքը չէր դառնա ավագանու անդամ:
Նրա խոսքով՝ բոլորն ուզում են «նաչալնիկ» լինել, մինչդեռ մեր խնդիրը մեկն է՝ Մեծ Հայասանը. «Մենք քանակով էլ ենք փոքր՝ սա նրա եղբայրն է, սանիկն է, բոլորն իրար ճանաչում են, իսկ եթե չեն ճանաչում, ապա երկու օրից ծանոթ են գտնում. սա մեր աղետն է: Սա ոչ թե քաղաքապետարանի աշխատողի, այլ մեր բոլորի ընդհանուր խնդիրն է»,- ասաց նա:
Լևոն Իգիթյանը այս տարիներին կարողացել է մեկ քաղաքացու ջրի խնդիր լուծել, ինչը երկու տարի չէր լուծվում: Բայց ամենակարևոր նվաճումը, ըստ նրա, Ժամանակակից արվեստի թանգարանի ջեռուցման խնդրի լուծումն էր: Նրա խոսքով՝ թանգարանը իր բովանդակությամբ Եվրոպայում լավագույններից մեկն է, որը քսան տարի ջեռուցում չուներ, գործերի մի մասը սկսել էին քայքայվել: Տարոն Մարգարյանը քաղաքապետ դառնալուց հետո անմիջապես լուծել է թանգարանի ջեռուցման հարցը:
Լուսանկարը՝ PanARMENIAN Photo-ի
