Samsung-ի Galaxy S IV-ի թողարկման նախօրեին LG ընկերությունը որոշել է հանրության ուշադրությունը սևեռել իր վրա՝ թողարկելով Galaxy S IV-ին շատ նման Optimus G-ի պատկերով պրոմոցուցապաստառներ: Այս մասին հայտնում է Vesti-ն:
Samsung-ն ակտիվորեն կիրառում է 4 թիվը իր Galaxy S IV-ի գովազդային արշավում: Samsung-ի ցուցապաստառներում 4 թիվը կիրառվում է որպես for նախդիրի փոխարինող, քանի որ այդ բառերը անգլերենում միանման հնչողություն ունեն: Գովազդի կարգախոսն այսպես է հնչում՝ Be ready 4 the next Galaxy: LG-ի Optimus G սմարթֆոնի գովազդն էլ այսպիսին է՝ Optimus G is here 4 you now:
LG-ն ոչ միայն պատճենում է Samsung-ի գովազդը, այլև փորձում է իր գովազդային վահանակները տեղադրել Samsung-ի պոստերների կողքին, միայն թե՝ ավելի բարձր:
Ամենայն հավանականությամբ, LG-ն որոշել է Samsung-ի դեմ կիրառել նրա սեփական մարտավարությունը: Ավելի վաղ Samsung-ը կարողացել էր զգալիորեն ամրապնդել իր դիրքերը՝ ծաղրելով Apple-ի ցուցապաստառներն ու գովազդային հոլովակները:
