Այս նախագահական ընտրությունները լավագույնս ապացուցեցին, որ իշխանական ընտրակեղծիքի մեքենան ամբողջովին փտած է, և դրա վրա հույս դնել այլևս չի կարելի: «Ժառանգության» ներկայացուցիչ Արմեն Մարտիրոսյանը հետընտրական հանրահավաքներից մեկի ժամանակ հայտարարեց, որ իշխանության կազմակերպած կրկնակի քվեարկությունները ձախողվել են, քանի որ ընտրատեղամաս բերված քաղաքացիները, ի նշան բողոքի, քվեարկել են Րաֆֆի Հովհաննիսյանի օգտին: Այսինքն՝ հասկանալի դարձավ, որ չի արդարացնում նաև ընտրակաշառքը: Իսկ թաղային կամակատարների դավթարներում ցուցակագրվածների միայն երեսուն տոկոսն է քվեարկում իշխանական թեկնածուի օգտին:
«Հրապարակին» հասած տեղեկություններով, ՀՀԿ-ն որոշել է դասեր քաղել նախագահական ընտրություններից և հատկապես մեծ պատասխանատվություն է դրել Երևանի վարչական շրջանների ղեկավարների վրա: Բարդ վիճակում են հայտնվել մանավանդ Աջափնյակ, Ավան, Արաբկիր համայնքների թաղապետերը, որտեղ հաղթել էր Րաֆֆի Հովհաննիսյանը: Վերջիններս պետք է կուսղեկավարությանն ապացուցեն իրենց հավատարմությունը և ապահովեն բարձր արդյունքներ ՀՀԿ-ի օգտին, այլապես վարչական վենդետայի կենթարկվեն: Եթե նախորդ ընտրություններին կատարվածը դեմոկրատական ընտրությունների «ատմասկայով» մատուցվեց հանրությանը, ապա դա չի նշանակում, որ այս անգամ էլ նույնը կարող են անել: Տարոնն էլ ապացուցելու խնդիր ունի, որ ինքը կարող ուժ է և արժանի է քաղաքապետի պաշտոնը զբաղեցնելուն: Ուստի, արդեն գործի են դրել ՀՀԿ-ական ոսկի երիտասարդությանը, թաղային մեծ ու փոքր հեղինակություններին, այսպես ասած՝ «ընտրական ջոկատներ» են կազմել ու պատրաստվում են մարտի: Ընտրություններին վերաբերվում են որպես ճակատամարտի, որտեղ պետք է ռևանշ վերցնեն փետրվարի 18-ի դիմաց: Այս օրերին նախապատրաստական ժողովներ են հրավիրում Տարոնի մոտ՝ խիստ գաղտնի, որոնց մասին որևէ խոսք չի ասվում հանրությանը: Նախօրեին ՀՀԿ-ականներից մեկն ասաց, որ մինչև ուշ գիշեր Տարոնի մոտ ժողով են արել ու քննարկել ՀՀԿ ցուցակի բովանդակությունն ու այլ կազմակերպչական հարցեր, սակայն հույժ գաղտնի է պահվում: Շտաբի պետ Շարմազանովն էլ, ով սովորաբար հաճույքով է շփվում լրագրողների հետ, այժմ խուսափում է հարցուպատասխանից:
Թե ինչ մեխանիզմներով ու մարտավարությամբ պետք է ապահովեն ՀՀԿ-ի հաղթանակը, թերթը փորձեց պարզել վարչական շրջանների պատասխանատուներից: Ավան համայնքի ղեկավար Մանվել Ջավադյանը, ով Տարոնի մտերիմ ընկերն է և ծանր վիճակում է նախագահականի արդյունքներից հետո, «Հրապարակի» հետ զրույցում ասաց, որ ինքը որևէ մեկին հրահանգներ չի իջեցրել և միայն քարոզարշավի մեկնարկից հետո կխոսի այդ թեմայով: Արդյո՞ք չի մտահոգվում, որ կարող է կրկնվել նախագահական ընտրությունների պատմությունը, Ջավադյանը գերադասեց այդ մասին խոսել հետո: Մալաթիա-Սեբաստիա համայնքի ղեկավար Դավիթ Օհանյանն ասաց, որ ինքն իր մարտավարությունից ու կազմակերպչական հարցերից կխոսի միայն քարոզարշավից հետո:
Նշենք, որ ՀՀԿ ցուցակում ընդգրկվելու են նաև վարչական շրջանների ղեկավարները, սակայն հետագայում ինքնաբացարկ են հայտնելու և զբաղեցնելու են իրենց պաշտոնները: Այսինքն՝ Տարոն Մարգարյանի անցած ուղին ոչ մի թաղապետ չի կրկնելու:
