«Մանչեսթեր Սիթի»-ի գլխավոր մարզիչ Մանուել Պելեգրինին հարցազրույց է տվել Չեմպիոնների միջազգային գավաթի խաղարկության շրջանակներում կայանալիք Մադրիդի «Ռեալ»-ի դեմ խաղից առաջ: Մասնագետը հաստատել է, որ հանդիպմանն իր նորամուտը կնշի թիմի նորեկ Ֆաբիան Դելֆը:
«Շուտով կմեկնարկի Պրեմիեր լիգայի նոր մրցաշրջանը: Այդ պատճառով հիմնական կազմի ֆուտբոլիստներն ավելի շատ ժամանակ կանցկացնեն խաղադաշտում: Կարծում եմ՝ Դելֆն էլ կնշի իր նորամուտը: 90 հազար երկրպագուների առջև ելույթ ունենալը լուրջ փորձություն է ցանկացած ֆուտբոլիստի համար: Թեկուզ արդյունքը կարևոր չէ, իսկ խաղն ընկերական է, բայց երկու թիմերն էլ պայքարելու են հաղթանակի համար:
Երկրպագուներն արժանի են ներկա լինելու դիտարժան խաղի, և ես վստահ եմ, որ «Ռեալ»-ի դեմ հանդիպումը դիտարժան կստացվի: Առաջիկա մրցաշրջանում մենք նոր «Մանչեսթեր Սիթի» կտեսնենք՝ թիմ, որը կմասնակցի չորս մրցաշարերի: Վստահ եմ, որ ամեն ինչ լավ կլինի»- «քաղաքայիններ»-ի պաշտոնական կայքը մեջբերում է Պելեգրինիի խոսքերը:
