Տաջիկստանի բարձրագույն դիվիզիոնում հանդես եկող «Խաիր» թիմի առաջատար ֆուտբոլիստ Փարվիզ Տուրսունովին նոր մրցաշրջանում արգելել են խաղադաշտ մտնել առանց սափրվելու:
Մեկնաբանելով խաղացողի որակազրկումը` թիմի գլխավոր մարզիչ Թոխիր Մումինովը հայտարարել է, որ ակումբի ղեկավարությունը Տուրսունովի հետ խնդիրներ չունի, այդ թվում` նաև նրա արտաքին տեսքի հետ կապված:
«Փարվիզի արտաքին տեսքի հետ կապված խնդիրներ ունի ՆԳՆ-ն: Քանի դեռ նա չի լուծել իր մորուքի խնդիրը, չի կարող վերադառնալ խաղադաշտ, ինչը չափազանց վատ ազդեցություն կունենա թիմի խաղի վրա: Նա մեր թիմի լավագույն խաղացողներից մեկն է, ով հավասարաչափ լավ է գործում թե՛ պաշտպանությունում, թե՛ հարձակման գծում»,- ասել է մարզիչը:
Իսկ ֆուտբոլիստը լրագրողների հետ հանդիպման ժամանակ հայտարարել է, որ եթե ինքն ընտրություն կատարի ֆուտբոլի և մորուքի միջև, ապա միանշանակ կընտրի երկրորդը:
«Ֆուտբոլն աշխարհիկ երևույթ է, իսկ մենք պետք է մտածենք հավերժականի մասին: Մորուքը Մուհամմեդ մարգարեի կարևորագույն պահանջներից մեկն է»,- ասել է Տուրսունովը:
