«Հացադուլը չէր մտնում այն տրամաբանության մեջ, որ կար նախընտրական և հետընտրական շրջանում»,- «Արմնյուզ» հեռուստաընկերության «Բանաձև» հաղորդման եթերում ասել է ԱԺ ՀՀԿ-ական փոխնախագահ Հերմինե Նաղդալյանը: Նա նշել է, որ անհնար է անտեսել 37 տոկոս ձայնը, որ տրվել է Րաֆֆի Հովհաննիսյանին, դա չի համընկնում ՀՀԿ քաղաքական հետագծի հետ:
«Եթե կա խնդիր, ծրագիր իրագործելու, գնալու համարգործակցության, պետք է և՛ քննարկել, և՛ հանդիպում, համագործակցություն ունենալ: Սերժ Սարգսյանն առաջարկել է հանդիպում, բայց դրա տեղը հրապարակը չէ, քանի որ կան այնտեղ հուզական ելույթներ, չկան ծրագրեր, կոնկրետիկա, որ պետք է քայլերի վերածվի: Մենք, որպես երկրի համար պատասխանատվություն կրող ուժ, համարում ենք, որ պետք է մինչև վերջին քայլը աշխատենք գնալ նրան, որ ունենանք այս կնճռի հարթում և իրական համագործակցություն: Եթե մերժում եք համագործակցության առաջարկները, բանակցությունները, թողնում եք մի բան՝ կա՛մ նոր ընտրություն, կա՛մ ԱԺ ընտրություն, մեկը մյուսից անհիմն: Մենք արել և անում ենք բոլոր հնարավոր առաջարկները համագործակցության համար՝ օրենսդրական, սահմանադրական և օրինական»,- ասել է Հերմինե Նաղդալյանն ու հավելել, որ Րաֆֆի Հովհաննիսյանն ունի 37,64 տոկոս, ուրեմն պետք է պահանջը լինի ադեկվատ:
Անդրադառնալով ՍԴ ներկայացված բողոքին՝ Հերմինե Նաղդալյանն ասել է, որ այն բացառիկ է իր փաստերի սակավությամբ՝համեմատած նախորդ տարիներին եղած դիմումների հետ: «Օպոզիցիան գտնվում է որոշակի քաղաքական փակուղում»,- ասել է Հերմինե Նաղդալյանը՝ դրա ապացույց համարելով Րաֆֆի Հովհաննիսյանի հացադուլը: Ազատության հրապարակում ակտիվությունն էլ, ըստ պատգամավորի, անկում է ապրում:
«ՀՀԿ-ն միշտ ասել է, որ մենք իշխանակռիվ չենք անում, պաշտոնի, աթոռի կռիվ չենք անում: Մեզ համար կարևոր չէ, թե ով ինչ լծակներ ունի, կարևորն այն է, թե ինչ ծրագրեր պետք է լուծենք, ինչ ձևաչափով գնանք, որ այդ ծրագրերն իրագործենք, որ հաջորդ ընտրություններում ավելի քիչ լինեն դժգոհները»,- ասել է Հերմինե Նաղդալյանը:
