Mitsubishi կորպորացիան պաշտոնապես ներողություն է խնդրել հարկադիր աշխատանքներում ամերիկացի ռազմագերիներին օգտագործելու համար, ովքեր ճապոնական զորքերի կողմից գերեվարվել էին Երկրորդ համաշխարհային պատերազմի ժամանակ։ Այս մասին հայտնում է BBC-ն։
Ընկերության կառավարման ներկայացուցիչը հանդիպել է նախկին ռազմագերի, 94-ամյա Ջեյմս Մերֆիի և այլ պատանդված ամերիկացիների հարազատների հետ։
Mitsubishi-ի ներկայացուցիչն ափսոսանք է հայտնել տեղի ունեցածի առնչությամբ, իսկ Մերֆին ընդունել է ընկերության ներողությունը։ Հանդիպումը տեղի է ունեցել Լոս Անջելեսում՝ Սիմոն Վիզենտալի կենտրոնում։
Ակտիվիստների խոսքով՝ սա առաջին դեպքն է, երբ ճապոնական ընկերությունը ներողություն է խնդրում ռազմագերիներից։
Կորպորացիայի ղեկավարությունը կարծում է, որ արարողությունը դարձել է կարևոր ժեստ պատերազմի ավարտի 70-ամյակի նախաշեմին, որը կնշվի օգոստոսին։
