Մեծ Բրիտանիայի արտաքին գործերի նախարար Ֆիլիպ Հեմոնդը երկրի խորհրդարանում հայտարարել է, որ չորեքշաբթի երեկոյան կմեկնի Իսրայել, որպեսզի անձամբ պարզի Իրանի միջուկային ծրագրի շուրջ ձեռք բերված համաձայնության էությունը, հայտնում է korrespondent.net-ը:
Հեմոնդի բառերով՝ հինգշաբթի նա հանդիպելու է երկրի վարչապետ Բենյամին Նեթանյահուի հետ, որտեղ նա կձգտի «ուղղակիորեն արտահայտել մեր դիրքորոշումը այդ համաձայնությունների վերաբերյալ»:
Միաժամանակ նա արտահայտել է այն կարծիքը, որ Իսրայելը գոհ չէր մնա ցանկացած համաձայնագրից, քանի որ «Իսրայելը Իրանի հետ գործարք չի ուզում ոչ մի տեսքով», և դա ո՛չ տարածաշրջանի, ո՛չ էլ Բրիտանիայի օգտին չէ:
Գերմանիայի ԱԳՆ ներկայացուցիչ Մարտին Շեֆերը չորեքշաբթի հայտարարել է, որ իրենք նույնպես փորձ են անում համոզել Իսրայելին Վիեննայում կնքված համաձայնագրի նպատակահարմարության մասին:
Իսրայելում անհանգստություն են արտահայտել այդ համաձայնության առթիվ: Մի շարք քաղաքագետներ ասել են, որ Արևմուտքը թույլ է տալիս պատմական սխալ:
