Փաստաբանների պալատի խորհուրդը երեկվա նիստում որոշել է վիրավորանքի և զրպարտության միջոցով արատավորված գործարար համբավի պաշտպանության պահանջի վերաբերյալ գործերով փաստաբանի վարձատրության ողջամիտ չափ նախատեսել 300 հազար, արատավորված պատվի և արժանապատվության պաշտպանության պահանջի վերաբերյալ գործերով` 200 հազար դրամից ոչ ավելի: Եթե առկա է երկու դեպքն էլ` կրկին 300 հազար դրամ է սահմանվել շեմը: Այս առաջարկը խորհրդատվական բնույթ ունի, սակայն ներկայացվելու է նաև դատավորներին:
Նշենք, որ այս որոշումը հատկապես վերաբերում է քաղաքացիական օրենսդրությամբ նախատեսվող` վիրավորանքի և զրպարտության համար անձի պատվին, արժանապատվությանը կամ գործարար համբավին պաճառված վնասի փոխհատուցման դեպքերին:
Փաստաբանների պալատին անհանգստացրել էր հատկապես վերջին շրջանում լրատվամիջոցների դեմ ներկայացվող` պատվին, արժանապատվությանը, գործարար համբավին պատճառված վնասի հատուցում նախատեսող հայցերում դատական ծախսերի համար պահանջվող գումարների չափը: Այս ծախսերի համար պահանջվող գումարները մինչև 3 միլիոն դրամի (շուրջ 8 հազար դոլար) սահմաններում են:
Պալատին առընթեր գիտավերլուծական կենտրոնը ուսումնասիրել էր իրավիճակը և գտել, որ իբրև դատական ծախսեր ներկայացվող թվերն ուռճացված են, և անհրաժեշտ է սահմանել վարձատրության ողջամիտ սանդղակ:
Ի դեպ, այս պահին հայաստանյան լրատվամիջոցների դեմ 12 դատական հայց կա ներկայացված։