Մոտ 15 տարի առաջ գիտնականները հայտնաբերել են, որ թեփի պատճառը Malassezia globosa սունկն է, որը սնվում է մաշկի յուղով։ Սունկն առանձնացնում է կողմնակի թթու արտադրանք, որը գրգռում է գլխի նուրբ մաշկն ու դառնում թեփի պատճառ։ Այս մասին հայտնում է The Daily Mail-ը։
Procter and Gamble ընկերության մասնագետները պարզել են, որ թեփոտության հիմքում ընկած է օդի աղտոտվածությունը։ Հետազոտությունը ցույց է տվել, որ թեփից տառապող մարդկանց մոտ 6 անգամ բարձր է գլխի մաշկի վրա օքսիդացման սթրեսի (հիդրոքսիլինոլային թթուներ)
կենսամարկերների մակարդակը։
Դեռևս հայտնի չէ, թե ինչի պատճառով է բարձրանում օքսիդացման սթրեսի մակարդակը։ Դա կարող է կապված լինել սնկի ակտիվության կամ անմիջականորեն օդի աղտոտվածության հետ։ Սակայն մասնագետները պարզել են, որ աղտոտված շրջանների բնակիչները հաճախ են տառապում թեփի ծանր ձևերից։
Գիտնականների խոսքով՝ այլ գրգռող միջոցները, ինչպիսիք են քրտինքն ու շոգը, նույնպես կարող են բարձրացնել օքսիդացման սթրեսի մակարդակը։ Procter and Gamble-ի մեկ այլ հետազոտությամբ պարզվել է, որ օդի աղտոտվածությունը մեծացնում է մաշկի հետ կապված խնդիրների առաջացման ռիսկը։
