«Հայաստանն այսօր մեծ թափով արտահանում է IT պոնտեցիալ, դրսից շատ կազմակերպություններ ներդրում են անում»,- «Առաջին լրատվական»-ի հետ զրույցում «BarCamp 2015» չ՛համաժողովի ընթացքում ասաց մարքեթոլոգ Արման Խաչատրյանը՝ հավելելով, որ խոսքն այն մասին չէ, որ երիտասարդ մասնագետները լքում են Հայաստանը, այլ այն ծրագրերի մասին, որոնք պատրաստվում են Հայաստանում հայ մասնագետների կողմից, և արդեն նրանց ստեղծած նախագիծը, պրոդուկտը արտահանվում է:
Նա նաև ընդգծեց, որ չնայած այն հանգամանքին, որ ՏՏ ոլորտը անընդհատ զարգանում է մասնագետների շնորհիվ, ակնհայտ է, որ Տիգրան Սարգսյանի ժամանակահատվածում ոլորտը շատ ավելի ներկայանալի էր. «Ինչ-որ հնարավորություններ, առավելություններ էին ստեղծվում նորաստեղծ IT բիզնեսների համար, ավելի շատ զարգացմանը միտված քայլեր էին կատարվում, քան հիմա»,- նշեց նա՝ հավելելով, որ դեռ անելիքներ կան հարկային, վարկային արտոնությունների հետ կապված:
Արման Խաչատրյանը ծրագրավորող ընկերոջ հետ միասին աշխատում է մի նախագծի վրա, որով ցանկանում են մտնել բջջային հավելվածների շուկա. «Պետք գտնել նոր լուծումներ, տրենդներ, կռահել նոր պահանջները, մինչև մարդիկ իրենք կհասկանան, որ դրա պահանջը ունեն, բոլոր ընկերությունները այդպես են արել`Apple-ը, Google-ը, մեր հավելվածը կապված է զվարճալի տեսանյութերի հետ»,- մանրամասնեց նա:
BarCamp-ում ներկայացվում էր նաև մի ծրագիր, որով 40 երիտասարդ մասնագետներ ներդրում էին անում մեկ այլ հետաքրքիր նախագծի համար՝ հավաքելով յուրաքանչյուրից 15 դոլար և տալով մինի գրանդ՝ 1000 դոլար: Ի դեպ, Մաշտոցի պուրակի հանրային դաշնամուրը այդ ծրագրի շրջանակում է իրականացվել: Չ՛համաժողովին ներկայացվում էին նաև բազմաթիվ այլ ծրագրեր ՝ մակարոնի կամրջից մինչև բջջային հավելվածներ, խաղեր…
Մանրամասները ՝ տեսանյութում:
