Ադրբեջանի արտաքին գործերի նախարար Էլմար Մամեդյարովը հայտարարել է, որ չի բացառում Բաքվի և Եվրասիական տնտեսական միության (ԵՏՄ) համագործակցությունը, սակայն միայն Հայաստանի հետ տարածքային վեճերի կարգավորումից հետո: Այս մասին գրում է RIA Novosti-ն:
«Երբեք մի ասա երբեք: Բոլոր տարբերակները պետք է գլխում պահել»,- ասել է Մամեդյարովը:
Նրա խոսքերով` «ներկայիս վարչակազմը դիտարկում է իր արտաքին քաղաքական դոկտրինան` ելնելով երկրի ազգային շահերից»:
«Այնտեղ բաղկացուցիչ մասերից մեկն է, ինչպես ասոցացման հետ համաձայնագրում, ազատ առևտրի գոտին: ԵՄ-ի հետ դա իրական չէ, քանի որ մենք ԱՀԿ անդամ չենք: Իսկ ինչ վերաբերում է ԵՏՄ-ին` այնտեղ մեծ դեր է խաղում Մաքսային միությունը»,- ասել է նախարարը:
Նա ընդգծել է, որ Հայաստանի հետ առկա խնիրը թույլ չի տալիս երկու երկրներին համատեղ գտնվել Մաքսային միությունում:
«Եթե Հայաստանը դուրս բերի իր զորքերը, սահմանները կբացվեն, եթե լինի դրության կարգավորում, տնտեսական բաղկացուցիչ տարր կլինի Հայաստանի և Ադրբեջանի միջև: Ով գիտի` ինչ կլինի վաղը»,- հայտարարել է Մամեդյարովը:
