Ռուս հայտնի հեռուստալրագրող Վլադիմիր Պոզները Մարդու իրավունքների հարցերով նախագահական խորհրդի և Մամուլի դեմ բողոքների հարցերով հասարակական կոլեգիայի համատեղ «Պետական կարգավորման ինքնակարգավորման փոխլրացումը զանգվածային տեղեկատվության ոլորտում» կոնֆերանսի ժամանակ մի քանի քննադատական հայտարարություն է արել Ռուսաստանում խոսքի ազատության վիճակի առնչությամբ: Այս մասին հայտնում է pozneronline.ru-ն:
«Ես դեռ աշխատում եմ, չնայած հնարավոր է՝ այս ելույթից հետո չաշխատեմ»,- ասել է Պոզները:
Նրա խոսքով՝ պետության և ԶԼՄ-ների հարաբերությունները պետք է կարգավորվեն միայն ԶԼՄ-ների մասին օրենքով և ուրիշ ոչնչով, բայց ներկայիս Ռուսաստանում իրավիճակն այլ է:
«Ես համոզված եմ, որ ԶԼՄ-ները լինում են կա՛մ պետությունից անկախ. այդ դեպքում դա չորրորդ իշխանությունն է, կա՛մ պետությունից կախված. այդ դեպքում դրանք ոչ միայն չորրոդ իշխանություն չեն, այլև դադարում են ԶԼՄ լինելուց, վերածվում են ազդեցության, պետական պրոպագանդայի գործիքի: Բավարար է նայել նորությունները պետական հեռուստաալիքների եթերում՝ համոզվելու համար, որ դրանք բոլորը նույնն են»,- ասել է Պոզները:
Նրա խոսքով՝ պետության կողմից ղեկավարվող ԶԼՄ-ներն այսօր նույն գործով են զբաղվում՝ որոշակի հասարակական կարծիք են ստեղծում, որը կուզենար տեսնել պետությունը:
Պոզների խոսքով՝ «այսօր Ռուսաստանում մի ձեռքի, առավելագույնը՝ երկու ձեռքի մատների վրա կարելի է հաշվել՝ քանի իրապես անկախ ԶԼՄ կա»:
Եթե պետությունն ուզենա փակել անկախ ԶԼՄ-ները՝ նա դրանք կփակի, վստահություն է հայտնել Պոզները:
«Այդ իմաստով իսկապես անկախ ԶԼՄ մեզ մոտ չկա: Այսօր Ռուսաստանում որպես մասնագիտություն՝ լրագրություն չկա, կան լրագրողներ»,- ասել է Պոզները:
