Երեկ տեղի ունեցան ՀՀ նախագահի ընտրությունները: Ըստ «Ժողովուրդի»՝ ինչպես միշտ, այս ընտրությունները ևս ուղեկցվեցին լուրջ, անգամ վաղուց մոռացված ընտրախախտումներով: Օրինակ՝ Արարատի մարզի Արւոաշատ քաղաքում տեղակայված 17/05 տեղամասում կատարվածը, ժամը 14:30-ի սահմաններում 25-30 երիտասարդ ներխուժել են տեղամաս և բռնություն գործադրելով «Իրավունքի Եվրոպա» հկ դիտորդ Նարինե Էսմաիլիի նկատմամբ՝ հանձնաժողովի ՀՀԿ-ական քարտուղար Անահիտ Սութանյանի օգնությամբ շուրջ 300 քվեաթերթիկ լցրել քվեատուփը: Ասել է թե՝ միջազգային ասպարեզներում արդար ընտրությունների խոստումներ տված իշխանությունները կեղծիքներն արել են հենց դիտորդների ներկայությամբ: Ու դրանք գրանցվեցին Սերժ Սարգսյանի նախընտրական շտաբի ղեկավար, Աժ նախագահ Հովիկ Աբրահամյանի «տիրապետության տակ գտնվող» մարզում:
Եվս մեկ ուշագրավ հանգամանք, այս ընտրություններն աննախադեպ էին անվավեր քվեաթերթիկների առատությամբ, մի շարք ընտրատեղամասերում անվավեր թերթիկները 3-րդ տեղում էին: Մայրաքաղաքում, Գյումրիում, Վանաձորում և էլի շատ քաղաքներում, ըստ նախնական արդյունքների, ջախջախիչ հաղթանակ էր տարել Րաֆֆի Հովհաննիսյանը: Սակայն գյուղական համայնքներից եկած թվերը հաշվելով՝ ժամը 02:30-ի նախնական տվյալներով այսպիսի պատկեր հրապարակվեց.
1. Սերժ Սարգսյան՝ 61,67% (441 029 ձայն)
2. Րաֆֆի Հովհաննիսյան՝ 33,73% (241.213)
3. Հրանտ Բագրատյան՝ 2,25% (16 116)
4. Պարույր Հայրիկյան՝ 1,13% (8 070)
5. Վարդան Սեդրակյան՝ 0,40% (2.886)
6. Անդրիաս Ղուկասյան՝ 0,58% (4.182)
7. Արման Մելիքյան՝ 0,23% (1.656):
