Ադրբեջանական Apa լրատվական գործակալության փոխանցմամբ, Ադրբեջանում ԵՄ ներկայացուցչության ղեկավար Ռոլանդ Կոբիան պարզաբանումներ տալու նպատակով կանչվել է արտգործնախարարություն: Այս մասին հայտարարել է Ադրբեջանի ԱԳՆ մամլո ծառայությունը:
ԱԳՆ-ում ԵՄ ներկայացուցչին տեղեկացրել են, որ Ադրբեջանի կառավարությունը դժգոհ է և ցավում է, որ 2011 թվականի ապրիլի 7-ին ԵԱՀԿ Մշտական խորհրդի նիստում ԵՄ-ը Ադրբեջանին քննադատության է ենթարկել քաղաքացիական ազատությունների սահմանափակման համար.
«ԵՄ այդ հայտարարությունն արվել է «սխալ, ոչ օբյեկտիվ» տեղեկատվության հիման վրա, այն «կանխակալ մոտեցում» ունի և «չի արտահայտում» Ադրբեջանում տիրող իրողությունները:
Այդ հայտարարությունն աընդունելի է և «հակասում» է Ադրբեջանի ու ԵՄ միջև գոյություն ունեցող հարաբերությունների ոգուն: Ադրբեջանի կառավարությունը «հավատարիմ» է մնում ժողովրդավարության զարգացմանն առնչվող իր սկզբունքներին, «կատարում» է միջազգային կազմակերպությունների առջև ստանձնած իր պարտավորությունները և այսուհետ ևս սերտորեն համագործակցելու է դրանց հետ:
Հիշեցնենք, որ ԵՄ-ն իր անհանգստությունն էր հայտնել ապրիլի 2-ին Բաքվում կայացած խաղաղ ցույցի բռնի ցրումից. «Ցույցի բազմաթիվ մասնակիցներ ձերբակալվել և վարչական պատիժներ են ստացել: Մենք Ադրբեջանին կոչ ենք անում անմիջապես ազատ արձակել ձերբակալված քաղաքացիներին և անհրաժեշտ պայմաններ ստեղծել լրագրողների անվտանգության համար, որպեսզի նրանք կարողանան ազատորեն իրականացնել իրենց պարտականությունները: Նրանց պետք է համապատասխան երաշխիքներ տրվեն»:
ԵՄ-ը լրջորեն մտահոգվել էր նաև «Ազադլիք» թերթի լրագրողներ Սեյմուր Խազիևի ու Ռամին Դեկոյի դաժանաբար ծեծի ենթարկվելու կապակցությամբ. «Մենք Ադրբեջանին կոչ ենք անում հրապարակավ քննադատել այդ դեպքերը և անել հնարավոր ամեն ինչ` մեղավորներին պատասխանատվության ենթարկելու, ինչպես նաև այսուհետ նմանօրինակ դեպքերը կանխելու համար»:
