ԱՄՆ նախագահ Բարաք Օբամայի վարչակազմը մշակել է օրինագիծ, որը թույլ է տալիս անօրինական էմիգրանտներին 8 տարվա ընթացքում օրինական կարգավիճակ ձեռք բերել: Դա հնարավոր կլինի մի շարք պահանջների կատարման դեպքում: Փաստաթղթի սևագիրը Սպիտակ տան պաշտոնյան անանունության պայմանով փոխանցել է USA Today-ին:
Օրինագիծը թույլ է տալիս նաև ԱՄՆ-ի անօրինական էմիգրանտներին դիմել վերջերս հայտնված վիզայի տեսակի՝ Lawful Prospective Immigrant-ի (Ապագա օրինական էմիգրանտ) ստացման համար: Դա նրանց ապահովագրական հիմնադրամի մեծ հասանելիություն է տալիս:
Նոր տեսակի վիզայի ստացման և իրենց գտնվելն ԱՄՆ-ում օրինականացնելու համար էմիգրանտները պետք է քրեական անցյալի ստուգում անցնեն, տրամադրեն կենսաչափական տեղեկություն և տուրքեր վճարեն: Վիզայի ստացման դեպքում նրանք կստանան ԱՄՆ-ում գտնվելու և աշխատելու իրավունք 4 տարի ժամկետով, որի լրանալուց հետո նրանք կարող են կրկին դիմում ներկայացնել՝ վիզան երկարացնելու համար:
Վիզայի համար դիմել կարող են նաև այն էմիգրանտները, որոնք սպասում են արտաքսման:
Համաձայն ծրագրի՝ 8 տարի անց էմիգրանտները կարող են դիմում ներկայացնել գրին քարտի ստացման համար: Դրա համար նրանք պետք է անգլերեն սովորեն, ուսումնասիրեն ԱՄՆ պատմությունն ու հարկեր վճարեն: Այնուհետև նրանք կարող են հավակնել քաղաքացիության:
Սպիտակ տան մշակած փաստաթուղթը նախատեսում է նաև սահմաների վերահսկողության ուժեղացում և էմիգրացիոն օրենսդրության խախտման հարցերով զբաղվող դատարաների թվի ավելացում:
Ներկայում ԱՄՆ-ում բնակվում է շուրջ 11 մլն անօրինական էմիգրանտ: Նրանց զգալի մասն աշխատում է գյուղատնտեսական ոլորտում: