«Րաֆֆի Հովհաննիսյանն անամոթ և տմարդի հայտարարություններ է անում:
Նա անում է իշխանամետ, իշխանահաճո հայտարարություններ, և մարդիկ, ցավոք սրտի, դրան ուշադրություն չեն դարձնում»,- «168 ժամի» թղթակցի հետ զրույցում ասել է ՀԱԿ-ին մաս կազմող ՍԴՀԿ վարչության անդամ Գուրգեն Եղիազարյանը` խոսելով վերջերս հարցազրույցներից մեկում նախագահի թեկնածուի այն հայտարարության մասին, որ «Ժառանգություն» կուսակցության անդամները 2008 թ. մարտի 1-ին կանգնել են ընդդիմության և Ոստիկանության միջև ու թույլ չեն տվել, որ զոհվեին ինչպես` ընդդիմադիրները, այնպես էլ` ոստիկանները:
Գուրգեն Եղիազարյանն ասել է, որ նման բան չէր կարող լինել, քանի որ ընդդիմությունը չի գնացել բախման ոստիկանության հետ:
«Համենայն դեպս իշխանությունները, նրանց նախաքննական մարմինը մինչ օրս չեն հայտնաբերել մեկ դեպք, որ ասեն՝ ընդդիմադիրները սպանեցին կամ վիրավորեցին ոստիկանին,- ասել է նա` ավելացնելով,- եթե սպանություններ են կատարվել, կատարել է իշխանությունը, և այդ որտե՞ղ էին այդ ժառանգականները, որ չպետք է թույլ տային: Ուրեմն թող թույլ չտային, որ տականքները 10 մարդ գնդակահարեին: Ահա այս վիճակն է եղել: Հիմա ելույթներ է ունենում, դուք ինձ ասում եք՝ նա ընդդիմադիր է: Նա ո՞նց կարող է ընդդիմություն լինել, նա կնեղանա, 10 օր կփախնի, հետո էլ կշնորհավորի, բայց սև վերնաշապիկ կհագնի»,- նշել է նա:
