Երևանի պետական համալսարանը չի փոխանցել պարտադիր կուտակային կենսաթոշակային համակարգում ընդգրկված ԵՊՀ-ում աշխատող դասախոսների 2014թ. երկրորդ կիսամյակի (մարտ-ապրիլ-մայիս) կենսաթոշակային կուտակային սոցիալական վճարը: Հետևաբար պետությունը չի կրկնապատկել դրանք, ու դասախոսները զրկվել են ոչ կլորիկ, բայց ինչ-որ գումարից։ Պետական մյուս հիմնարկություններում այդ ամիսների վճարումները կատարվել են՝ թեև դեկտեմբերին, բայց կատարվել են։ Այս մասին բարձրաձայնում են ԵՊՀ դասախոսները:
ԵՊՀ պրոռեկտոր Ռուբեն Մարկոսյանն «Առաջին լրատվական»-ի հետ զրույցում բացառեց նման բանի հնարավորությունը: «Ես կարծում եմ, որ բոլոր վճարներն ըստ անհրաժեշտության և ըստ օրենքի կատարվել են»,- ասաց Մարկոսյանը՝ հավելելով, որ հաշվապահն առավել իրազեկ է այդ հարցերում:
ԵՊՀ հաշվապահ Ռաֆիկ Գրիգորյանն էլ մեզ հետ զրույցում նախ նույնպես բացառեց նման բանի հնարավորությունը, քանի որ իրենց մոտ համակարգ է տեղադրված, որը նորմալ աշխատում է, սակայն, միևնույն ժամանակ, ավելացրեց, որ այն դասախոսները, ովքեր նման խնդիր ունեն, թող դիմեն իրենց, իրենք կնայեն խնդիրը:
«Ով հարց ունի, խնդիր ունի, թող դիմի ինձ՝ կնայենք հարցը: Թե չէ՝ ես հիմա չեմ կարող մարդկանց մասին տեղեկություններ տրամադրել ձեզ, դրանք անձնական տվյալներ են»,- ասաց ԵՊՀ հաշվապահը:
Մեր դիտարկմանը՝ մենք մարդկանց անձնական տեղեկությունները չենք պահանջում, այլ պարզաբանում՝ ԵՊՀ-ն փոխանցե՞լ է արդյոք 1974 թվականից հետո ծնված դասախոսների 2014թ. երկրորդ եռամսյակի սոցիալական վճարները, թե՞ ոչ, Գրիգորյանն արձագանքեց. «Թող գան, ես իրենց կպարզաբանեմ»:
