Nina Ricci նորաձևության տան ժառանգորդուհուն՝ 73-ամյա Արլետ Ռիչիին, դատապարտել են մեկ տարվա ազատազրկման, 4 մլն եվրո արժողությամբ անշարժ գույքի առգրավման և մեկ մլն եվրո տուգանքի՝ հարկերի վճարումից խուսափելու ու փողերի լվացման համար: Այս մասին հաղորդում է The Washington Post-ը:
Փարիզի դատարանը վճռել է, որ Նինա Ռիչիի թոռնուհին շվեյցարական HSBC բանկում թաքցրել է ավելի քան 22 մլն եվրո՝ օգտվելով Պանամայում բացված օֆշորային ընկերություններից:
Ռիչիի փաստաբան Ժան-Մարկ Ֆեդիդան հայտարարել է, որ պատրաստվում է ներկայացնել պատժի մեղմացման միջնորդագիր իր պաշտպանյալի տարեց լինելու հիմքով՝ փորձելով խափանման միջոցը փոխել տնային կալանքով և էլեկտրոնային թևնոց կրելով:
Արլետ Ռիչիի դուստրը՝ 51-ամյա Մարգո Վինյան, ստացել է 8 ամսվա պայմանական պատժաժամկետ:
