Թուրքիայի ընդդիմադիր «Ժողովրդա-հանրապետական» կուսակցության՝ ազգությամբ հայ պատգամավորության թեկնածու Սելինա Օզուզուն Դողանը հարցազրույցի ժամանակ խուսափել է խոսել Հայոց ցեղասպանության թեմայից, սակայն շեշտել է, որ ապրիլի 24-ին Ստամբուլի Թաքսիմ հրապարակում մասնակցելու է հիշատակի միջոցառմանը:
Դողանը զրուցել է «Ալ Ջազիրա» լրատվականի թուրքական բաժնի հետ, որի ընթացքում էլ խոսել է իր թեկնածությունից, սպասվելիք աշխատանքներից:
Սելինան նշել է, որ չի ցանկանում, որպեսզի իրեն ուղղեն «այն» հարցը, այսինքն՝ Հայոց ցեղասպանությանը վերաբերող հարցը, բայցև հավելել է, որ ապրիլի 24-ին մասնակցելու է Թաքսիմում կազմակերպվելիք միջոցառմանը, որի ժամանակ հարգելու են Հայոց ցեղասպանության զոհերի հիշատակը:
Սելինա Օզուզուն Դողանը հարցազրույցի ժամանակ վերահաստատել է, որ իր համար ևս անակնկալ է եղել այն, որ իր կուսակցությունը որոշել է իրեն առաջադրել Ստամբուլի երկրորդ ընտրատարածքի համամասնական ցուցակի առաջին տեղում:
Նշենք, որ Սելինա Դողանը ծնվել է 1977 թվականին Ստամբուլում: Ավարտել է ֆրանսիական լիցեյը, սովորել է Գալաթասարայի իրավաբանության ֆակուլտետում, ապա նաև Բիլգի համալսարանում: Այժմ մասնավոր մի ընկերությունում որպես իրավաբան է աշխատում: Նա տիրապետում է հայերենի, թուրքերենի, ֆրանսերենի և անգլերենի: Հայրը Երվանդ Օզուզունն է, որը եղել է Ստամբուլի Բաքըրքյոյի նախկին փոխքաղաքապետը: Ամուսինն էլ փաստաբան Էրդալ Դողանն է, որը Հրանտ Դինքի սպանության գործով զբաղվող փաստաբաններից է:
Այսպիսով, արդեն հայտնի է, որ Թուրքիայի խորհրդարանական ընտրություններին մասնակցելու է առնվազն 4 հայ թեկնածու, բոլորն էլ պայքարելու են Ստամբուլում: Թուրքիայի իշխող «Արդարություն և զարգացում» կուսակցությունը հայ լրագրող, գրող Մարգար Եսայանի, իսկ ընդդիմադիր քեմալական «Ժողովրդա-հանրապետական» կուսակցությունը Սելինա Օզուզուն Դողանի թեկնածություններն են առաջադրել: Քրդական «Ժողովուրդների դեմոկրատական» կուսակցության համամասնական ցուցակներում երկու հայ թեկնածու կա՝ Կարո Փայլանն ու Մուրադ Մըհչըն:
Հիշեցնենք, որ Թուրքիայի Ազգային մեծ ժողովի ընտրությունները նախանշված են հունիսի 7-ին:
