Հայրիկյանի դեմ մահափորձի առթիվ վարույթ իրականացնող ԱԱԾ քննչական վարչության հայտնած օպերատիվ տեղեկություններն ավելացնում են հարցականներն այս մութ գործում: «Հրապարակը» գրում է, որ իրավապահները հայտնում են, որ կասկածյալներ Խաչատուր Պողոսյանը և Սամվել Հարությունյանը ինքնախոստովանական ցուցմունքներ են տվել, բայց հեռուստատեսությամբ ցուցադրված կադրերում նրանք լուռ էին և վախեցած նայում էին կամերային: «Ինքնախոստովանության» գոնե մի փոքր դրվագ չցուցադրեցին՝ ավելի համոզիչ լինելու համար, այն դեպքում, երբ «02»-ն ամեն մի հասարակ «կաթսա» գողացողից հարցազրույց է վերցնում: 1966 թ. ծնված Խաչատուր Պողոսյանի մասին, որի տանը հայտնաբերվել է նագանը, ասվում է, որ նա նախկինում դատապարտված է եղել թմրամիջոցների ապօրինի վաճառքի համար: Հարությունյանի մասին ոչ պաշտոնական տեղեկություն է շրջանառվում, որ նրա եղբայրը նույնպես հանցագործ աշխարհի ներկայացուցիչ է: Այս տվյալները հաղորդվելուն պես շատերը հետևություն արեցին, որ նշված անձինք կախյալ են իրավապահներից և գործարքի մեջ են կամ էլ ԱԱԾ հրամանով կալանավայր գործուղվողներ են: Կնստեն՝ դուրս կգան:
Բայց հարցերի հարցը սպանության դրդապատճառն է. ինչո՞վ էր այս տղաներին խանգարում Հայրիկյանը: Վարկածներից մեկը, որը ձերբակալումից երկու օր անց նետվեց մամուլ, առնչվում է էպոսագետին: Իրավապահներն այս մասին հայտարարություն չեն արել, բայց ինքը՝ Վարդան Սեդրակյանը չժխտեց, որ ճանաչում է բռնվածներից երկուսին էլ: Մեկն իրենց հարևանն է, մյուսն էլ իրենց տանը գործ անող բանվորներին է տարել-բերել իր տաքսիով: Նա սառնասրտորեն կանխատեսեց, որ ընտրություններից հետո իրեն անպայման կձերբակալեն: Համաձայնեք, որ այս սառնասրտությունը բնորոշ չի նման վիճակում հայտնվող այլ հանրային գործիչների: Օրինակ, Օսկանյանին, որն առնվազն նյարդայնացած էր իրեն առաջադրված մեղադրանքից և խուսափում է խոսել թեմայի շուրջ: Իսկ էպոսագետը նույնիսկ չի ժխտում, որ իր հին «Վոլվոն» նվիրել է ենթադրյալ քիլլերներից մեկին: Երեկ նա պաշտպանեց երկուսին էլ: «Խաչիկի մասով չեմ կարող ասել, քանի որ ընդամենը մի տարի եմ ճանաչում, բայց Սամվելին փոքր երեխա ժամանակից գիտեմ: Ինքը նույնիսկ բանակ չի գնացել, երևի զենքը հեռուստացույցով է տեսել: Շատ լավ արհեստավոր է, բայց որ գնա մարդ սպանի, չգիտեմ: Նույնիսկ չգիտեմ, Սամվելը 8-րդ դասարանն ավարտեց, թե չէ: Մեկը 8-ի Բ-ն է ավարտել, մյուսը՝ 7-ի Գ-ն: Մեկը լավ նստած է դեղերի վրա, որ կես ժամ ուշանա, կգրի, էն մեկին էլ էնքան կծեծեն, որ ինչ ուզես, կգրի: Իրեն այստեղ կծեծեն, ախպորն էլ՝ էն մյուս տեղում»:
«Հրապարակի» տեղեկություններով, իրավապահները շոշափում են Սեդրակյանի հետ առնչվող անձանց շրջանակը, ուսումնասիրվում են նրա կապերը «Միտք» վերլուծական կենտրոնի հետ, որի շենքում գտնվում է Վարդան Սեդրակյանի աշխատասենյակը: Կենտրոնի մասնագետները հիմնականում աչքի են ընկել Հարավային Կովկասում և հարակից շրջաններում քաղաքական գործընթացների և տնտեսական իրավիճակի ուսումնասիրությամբ: Ընդ որում, «Միտքի» վերլուծաբաններն ազգային խնդիրները լուծելիս ամենառադիկալ քայլերի կողմնակից են եղել, ինչպիսին է, օրինակ, Վարդան Սեդրակյանի ծրագրում Նախիջևանը Հայաստանին միացնելու կետը: Հենց այս կենտրոնի հետ էր առնչվում երիտասարդ և արկածախնդիր գործիչ Էդգար Հելհելյանը, որն անշուշտ հետաքրքիր է իրավապահներին: Նա երեք տարի առաջ «Ազգային նոր պահպանողական շարժում» կուսակցությունը ստեղծեց, նաև մի կայք, որը ֆինանսավորում էր Անդրանիկ Նիկողոսյանը, որը ներկայանում է որպես ԱՊՀ-ում երիտասարդական խորհրդի ղեկավար: Ըստ լուրերի, Հելհելյանը բոլորին «քցել» է, բոլոր տեղերից, այդ թվում «Միտք»-ից, քշվել է և փախել Ռուսաստան:
Ի դեպ, մեկ տարի առաջ նա հարցազրույց էր տվել «Հետք»-ին, որտեղ փառաբանել էր Ռոբերտ Քոչարյանին և հեռակա առաջարկել նրան իր թեկնածությունն առաջադրել, քանի որ ինքն է միակ փրկությունը հայ ազգի համար: Ըստ «Միտք» կենտրոնի տնօրեն Էդուարդ Աբրահամյանի, Հելհելյանը կենտրոնի հետ կապ չի ունեցել և գաղափարական առումով հակասություններ է ունեցել կենտրոնի վերլուծաբանների հետ, ապա ինչ-որ փաստաթղթեր է վերցրել և հեռացել: Ինչ վերաբերում է Սեդրակյանին, ապա, ըստ Աբրահամյանի, նա մի շարք սեմինարներ է անցկացրել երկու տարի առաջ: «Հիմա նա մեր շենքում է, զուտ ընկերական կարգով օգնում ենք նրան, իսկ եթե հարց է լինում, ինքն է օգնում մեզ»,- ասաց Էդուարդ Աբրահամյանը: Հարցին, թե ինչպես է վերաբերվում Սեդրակյանի՝ մահափորձի մեջ մեղադրվելու վարկածին, ասաց. «Մարդը, որը զբաղվել է գիտությամբ, որոշել է երկրի համար լավ բան անի, և մի օրում ինչ բացասական գաղափար ասես, որ չեն մտցրել: Նրա ինչի՞ն էր պետք, ի՞նչ իմաստ ուներ դա անելը»:
Էդուարդ Աբրահամյանը պաշտպանության նախարարության ռազմաօդային ուժերի նախկին հրամանատար Ալիկ Աբրահամյանի որդին է և քարոզարշավից առաջ մամուլում վարկած շրջանառվեց, որ հենց Ալիկ Աբրահամյանն է կանգնած Վարդան Սեդրակյանի մեջքին և հովանավորում է նրան: Մեկնաբանելով այս կարծիքը, Էդուարդ Աբրահամյանն ասաց. «Սկզբից Սեդրակյանին փորձում էին կապել երկրների հետ, կառույցների հետ, հետո հորս հետ կապեցին: Իմ հոր հետ մի անգամ են երևի իրար տեսել: Հետո, իմ հայրը ոչ զբաղվում է քաղաքականությամբ, ոչ էլ նման ցանկություն ունի: Ինքն իր ագարակում իր համար հանգստանում է»:
«Հրապարակը» Վարդան Սեդրակյանին էլ մի քանի հարց ուղղեց իր և Հայրիկյանի դեմ կատարվածի կապի մասին:
– Դա իմ սիրած թեման է, ամբողջ կյանքս մահափորձերի մեջ եմ:
– Երբ նման կասկածներ կան, անձինք նյարդայնանում են, իսկ Դուք հանգիստ եք:
– Ես 88 թվականից եմ Սերժ Սարգսյանին ճանաչում: Նրա գործելակերպն էլ գիտեմ: Ես եղել եմ Վազգենի ամենամոտիկ մարդկանցից մեկը:
– Ուզում եք ասել, որ սարքո՞ւմ են Ձեր գլխին:
– Եզդին գյուղինստիտուտ է ուզում փողով ընդունվի, նենց հարց պետք է տան, որ նա պատասխանի: Ասում են՝ ի՞նչ է մտնում բանջարաբոստանային կուլտուրաների մեջ: Եզդին պատասխանում է՝ որ հասար (չափար) չքաշենք, կով էլ կմտնի, օճխար էլ: Հիմա, Եթե քայլեր չանես, գործ էլ կսարքեն, ամեն ինչ էլ կանեն:
Հայրիկյանը նախաքննության վերաբերյալ ոչ մի հարցի չի պատասխանում, իսկ Վարդան Սեդրակյանին երեկվա իր ասուլիսում բնորոշեց որպես տարօրինակ մարդ:
