Կատալոնական «Բարսելոնա»-ի, Մադրիդի «Ռեալ»-ի և Պորտուգալիայի հավաքականի նախկին կիսապաշտպան Լուիշ Ֆիգուն, ով ՖԻՖԱ-ի նախագահի պաշտոնի հավակնորդ է, հայտարարել է, որ չի վախենում կազմակերպության ներկայիս նախագահ Յոզեֆ Բլատերի հետ մրցակցությունից: Միաժամանակ Ֆիգուն նշել է, որ Բլատերը որոշ առումով նպաստել է ֆուտբոլի զարգացմանը:
«Ոչ մի դեպքում չի կարելի ասել, որ ես վախենում եմ Բլատերից: Ես հարգում եմ նրան, քանի որ վերջին տարիներին նա մեծ ներդրում է ունեցել ֆուտբոլի զարգացման գործում: Սակայն ժամանակն է, որ Բլատերը հեռանա ՖԻՖԱ-ի նախագահի պաշտոնից»,- Marca-ն մեջբերում է Ֆիգուի խոսքերը:
Հիշեցնենք` ՖԻՖԱ-ի նախագահի ընտրություններին մասնակցելու են նաև Հորդանանի արքայազն Ալի բին Ալ Հուսեյնը և Հոլանդիայի ֆուտբոլի միության նախագահ Միխայել վան Պրագը:
