Հարյուր տարի առաջ՝ 1915թ. հունվարի 25-ին, տեղի է ունեցել պատմության մեջ առաջին միջմայրցամաքային հեռախոսազրույցը՝ հայտնում է TASS-ը: Հեռախոսի գյուտի հեղինակ Ալեքսանդր Բելլը Նյու Յորքից զանգահարել է իր նախկին ասիստենտ Թոմաս Ուոթսոնին, ով այդ ժամանակ եղել է ԱՄՆ մյուս ափին՝ Սան Ֆրանցիսկոյում:
«Ալո: Ալո: Պարոն Ուոթսոն, Դուք այստե՞ղ եք»,- ասել է Բելլը: «Այո, պարոն Բելլ, ես Ձեզ հրաշալի լսում եմ: Իսկ Դուք ինձ լա՞վ եք լսում»,- պատասխանել է Ուոթսոնը:
Դրանից հետո Բելլն ասել է նույն խոսքը, ինչ 38 տարի առաջ, երբ նրա և Ուոթսոնի միջև տեղի է ունեցել պատմության մեջ առաջին հեռախոսազրույցը: Բայց այս անգամ նրանց բաժանել է ոչ թե մի քանի մետր, այլ մոտ 5500 կմ: «Պարոն Ուոթսոն, մտեք ինձ մոտ: Դուք ինձ պետք եք»,- ասել է Բելլը: Ի պատասխան՝ նրա նախկին օգնականն ասել է. «Ես հաճույքով, բայց վախենամ՝ ճանապարհը Ձեզ մոտ ինձնից մեկ շաբաթից պակաս չի պահանջի»:
Միջմայրցամաքային խոսակցությանը մասնակցել են նաև ԱՄՆ այդ ժամանակվա նախագահ Վուդրո Վիլսոնը, ով կապվել է Վաշինգտոնից՝ Սպիտակ տնից, և զանգը կազմակերպած ամերիկյան American Telephone and Telegraph (AT&T) հեռահաղորդակցական ընկերության ղեկավար Թեոդոր Վեյլը՝ Ջորջիա նահանգից:
Որպեսզի այդ խոսակցությունն իրականանար, պահանջվել է 130.000 հեռախոսասյուն և 2.500 տոննա հաղորդալար:
Արդեն նույն օրվա երեկոյան միջմայրցամաքային հեռախոսակապից օգտվելու հնարավորություն է ունեցել յուրաքանչյուր ցանկացող: Խոսակցության 3 րոպեն արժեցել է 20 դոլար 70 ցենտ՝ ներկայիս գներով մոտ 485 դոլար:
Պատմության մեջ առաջին անդրատլանտյան հեռախոսային խոսակցությունը տեղի է ունեցել 1927-ին՝ Նյու Յորքի և Լոնդոնի միջև: