Ադրբեջանի և Թուրքիայի նման հարևաններ ունեցող պետությունը պետք է միշտ հաշվի առնի հնարավոր բոլոր սպառնալիքները: «Առաջին լրատվական»-ի հետ զրույցում այս մասին ասաց Ազգային ժողովի արտաքին հարաբերությունների հանձնաժողովի նախագահ Արտակ Զաքարյանն՝ անդրադառնալով երեկ ՀՀ պաշտպանության նախարարությունում Հայաստանի օրենսդիր, գործադիր և դատական իշխանությունների ղեկավարությունների ընդլայնված կազմով նիստում ՀՀ նախագահ Սերժ Սարգսյանի ելույթին և ներկայումս նման խորհրդակցության անհրաժեշտությանը։
Ըստ նրա՝ Թուրքիայի և Ադրբեջանի նման հարևաններ ունեցող պետությունը միշտ էլ պետք է ի նկատի ունենա հնարավոր բոլոր սպառնալիքները և միշտ պատրաստ լինի դրանց, ինչն էլ ՀՀ-ն իրականացնում է: Ուստի, պատգամավորի խոսքերով, դրանով էլ պայմանավորված է ռազմաքաղաքական համագործակցության բաղադրիչի և անվտանգության խնդիրների վրա մեծ ուշադրություն դարձնելու քաղաքական մոտեցումները, որովհետև որևէ ոլորտում հնարավոր չէ զարգացնել հաջողություններ, ունենալ ձեռքբերումներ, երբ անվտանգությունը բավարար մակարդակով ապահովված չէ և պետական պաշտպանությանն առնչվող խնդիրները լուծված չեն:
«Ունենք բավարար պաշտպանվածության մակարդակ, անվտանգության տարբեր համակարգեր, միջազգային համագործակցություն այդ ուղղությամբ: Բնականաբար, Ադրբեջանի և Թուրքիայի հակահայկական ընդգծված քաղաքականությունը մեզ միշտ պետք է սթափ և զգոն պահի, հավասարակշռությունն ու ուժերի ապահովման և քաղաքական հավասարակշռությունն՝ արտաքին ու ներքին առումով, մենք պետք է կարողանանք ապահովել և պահպանել այնպես, որ ցանկացած պահի կարողանանք դիմագրավել բոլոր տեսակի սպառնալիքներին: Ադրբեջանն ինքնին սպառնալիքի աղբյուր է, տարածաշրջանի անվտանգությանը սպառնացող ամենաիրական սուբյեկտն է: Ուստի մեր գործողությունները պայմանավորվում են նաև նրանով, թե Ադրբեջանն ինչպիսի ռազմավարական պլանավորում է իրականացնում, իսկ այդ ռազմավարական պլանավորումն այսօր Ադրբեջանում հիմնված է հակահայկական քարոզչության և հայատյացության ֆոնի վրա»,- ասաց Արտակ Զաքարյանը՝ հավելելով, որ ՀՀ-ն իր բոլոր ստրուկտուրաները պետք է կարողանա պատրաստ պահել. սա ՀՀ-ի անվտանգության երաշխիքն է:
Հանրապետական պատգամավորի դիտարկմամբ՝ խորհրդակցության անցկացման պատճառներ պետք չէ փնտրել, որովհետև պատճառներն այս պահին ի հայտ եկած պատճառներ չեն: «Պարզապես, հաշվի առնելով տարբեր խնդիրներ, հաշվի առնելով այն հանգամանքը, որ անվտանգությունը մեզ համար միշտ լինելու է առաջնային նշանակության հարց, այս պրակտիկան շատ լավ միջավայր է, որ պետական բոլոր կառույցները համատեղ կարողանան միասին քննարկել և ունենալ այս հարցում ընդհանուր մոտեցումներ»,- պարզաբանեց Արտակ Զաքարյանը:
Հիշեցնենք, որ երեկ ՀՀ պաշտպանության նախարարությունում Հայաստանի օրենսդիր, գործադիր և դատական իշխանությունների ղեկավարությունների ընդլայնված կազմով նիստ է տեղի ունեցել՝ ՀՀ նախագահ Սերժ Սարգսյանի գլխավորությամբ։ Նիստի ընթացքում քննարկվել են ՀՀ արտաքին քաղաքական առաջնահերթությունները՝ Արցախի դեմ Ադրբեջանի կողմից սանձահարված ագրեսիվ պատերազմում տարած հաղթանակի վերջնական իրավական ձևակերպումը, հայ-ռուսական ռազմավարական դաշնակցային գործընկերությունը և այլ հարցեր:
