Այսօր Հայաստանում ԵՄ պատվիրակությունը 15 նոր համագործակցության համաձայնագիր ստորագրեց՝ երկրում բարեփոխումների աջակցության 10 մլն եվրո ընդհանուր բյուջեով: Բոլոր նոր համաձայնագրերը կիրականացվեն երկկողմ և տարածաշրջանային համագործակցության տարբեր ուղղություններով՝ ներառյալ գյուղատնտեսությունն ու գյուղական համայնքների զարգացումը, աջակցությունը քաղաքացիական հասարակության կազմակերպություններին և տեղական ինքնակառավարման մարմիններին:
Նոր գործողությունները միտված են քաղաքացիական հասարակության կազմակերպությունների և տեղական մարմինների, ինչպես նաև Հայաստանի կառավարության բարեփոխումների աջակցությանը: Ստորագրման արարողությանը ողջույնի խոսքով հանդես եկավ Հայաստանում ԵՄ պատվիրակության ղեկավար, դեսպան Տրայան Հրիսթեան:
«ԵՄ-ն հանձնառու է խորացնել հարաբերությունները Հայաստանի հետ և պատրաստ է ամրապնդել երկկողմ համագործակցությունն ընդհանուր արժեքների վրա հիմնված համատեղ հետաքրքրության ուղղություններով: Սիրով ողջունում եմ ԵՄ ֆինանսավորմամբ իրականացվելիք այս կարևոր նախաձեռնությունների մեկնարկը»,- ասաց դեսպանը:
Նոր պայմանագրերից չորսը միտված են աղքատության կրճատմանն ու կայուն զարգացմանը, որը կիրականացվի ոչ պետական դերակատարների և տեղական մարմինների միջոցով: Ծրագրերը կնպաստեն Շիրակի մարզի գյուղական համայնքների սոցիալական և տնտեսական դժվարությունների նվազեցմանը, Վայոց ձորում կայուն զբոսաշրջության զարգացմանն ու մեղվաբուծության խթանմանը, և Ջուջևանում, Բաղանիսում և Ոսկեվանում հանրային ծառայությունների զարգացմանը: Մեկ այլ ծրագիր կնպաստի Վայք և Սպիտակ քաղաքներում վերականգնվող և արդյունավետ էներգիայի աղբյուրների իրականացմանը:
Նոր ծրագրերի մեծ մասը կատարվում են «Ժողովրդավարություն և մարդու իրավունքներ» գործիքի և «Ոչ պետական դերակատարների և տեղական մարմինների զարգացման» թեմատիկ ծրագրի միջոցով հայտարարված գլոբալ և տեղական հայտամրցույթների հրավերների արդյունքում:
Համաձայնագրերը ստորագրեցին Հայաստանում ԵՄ պատվիրակության ղեկավար Ն. Գ. Տրայան Հրիսթեան և շահառու կազմակերպությունները:
