«Ատլետիկո»-ի գլխավոր մարզիչ Դիեգո Սիմեոնեն հայտնել է , որ ակումբը, հավանաբար, չի կարող պահպանել Կոլումբիայի ազգային թիմի հարձակվող Ռադամել Ֆալկաոյին հաջորդ մրցաշրջանում:
«Պետք է իրատես լինել և չխաբել մարդկանց: Մենք չգիտենք՝ կմնա՞ արդյոք Ֆալկաոն թիմում հաջորդ մրցաշրջանում: Այսօր նա օգնում է մեզ գոլեր խփել, հաղթանակներ գրանցել: Եկեք հուսանք, որ Ֆալկաոն առաջիկայում ևս կմնա «Ատլետիկո»-ում: Իսկ եթե ոչ, ապա հաջողություններ մաղթենք նրան»,- իսպանական լրատվամիջոցները մեջբերում են Սիմեոնեի խոսքերը:
Հիշեցնենք` Ֆալկաոն մադրիդյան ակումբ է տեղափոխվել 2011 թվականի ամռանը` «Պորտու»-ից: Նրա պայմանագրի կետի համաձայն` հրաժարագինը կազմում է 60 մլն եվրո, իսկ պայմանագիրն ուժի մեջ է մինչև 2016 թվականը:
