Վրաստանի արտգործնախարարությունն այսօր Facebook սոցցանցում տարածել է նախարար Մայա Փանջիկիձեի՝ հունվարի 10-ին Լիտվայում ունեցած ելույթի տեսագրությունը, հաղորդում է «Նովոստի-Գրուզիա» գործակալությունը: Իր ելույթում նախարարը հայտարարություն էր արել՝ կապված Ադրբեջանի տարածքային ամբողջականության հետ:
Դրանից հետո ԶԼՄ-ներում լուրեր էին տարածվել, որ Փանջիկիձեն, խոսելով Ղարաբաղյան հակամարտության մասին, հայտարարել էր, որ հակամարտությունը կարելի է կարգավորել միայն «հօգուտ Ադրբեջանի տարածքային ամբողջականության»: Վրաստանի խորհրդարանական փոքրամասնության ներկայացուցիչները իրենց բողոքն էին արտահայտել այդ կապակցությամբ՝ պահանջելով արտգործնախարարի հրաժարականը:
Տեսագրության համաձայն՝ ելույթի ժամանակ Փանջիկիձեն ընդհանուր առմամբ աջակցություն է հայտնել Ադրբեջանի տարածքային ամբողջականությանը, սակայն Լեռնային Ղարաբաղի մասին չի հիշատակել: Վրաստանի արտգործնախարարը նշել է, որ տարածքային հակամարտություններից յուրաքանչյուրն իր առանձնահատկությունն ունի, և կողմ է արտահայտվել տարածաշրջանում բոլոր նման հակամարտությունների կարգավորմանը:
