«Հայաստանի ջրային համակարգում հոսկորուստները շարունակվում են և զգալի վնաս հասցնում ընկերությանը, իսկ այդ խնդրի կարգավորումը պահանջում է բավականին լուրջ միջոցներ: Ջրային համակարգում տարբեր պատասխանատուների առկայությունը`օպերատոր, համատիրություն, բաժանորդ, խոչընդոտում է համակարգի խնդրի ամբողջական կարգավորմանը»,- այս մասին այսօր հրավիրված ասուլիսի ընթացքում ասաց «Երևան ջուր» ընկերության հաճախորդների հետ փոխհարաբերությունների գծով տնօրեն Գագիկ Մարգարյանը:
«Մեր ուսումնասիրությունները բազմաբնակարան 113 շենքերում ցույց են տալիս, որ սպառողների ներքին ցանցերում կորուստները ավելի քան 50 տոկոս են, իսկ ջրաչափական սարքերի որակը չի ապահովում ջրի սպառման ճշգրիտ հաշվառում: Այս երկու խնդրի կարգավորումն օրենսդրորեն և գործնականում հնարավորություն կտար ջրամատակարար կազմակերպություններին իրականացնել ջրային համակարգի ամբողջական և տնտեսապես առավել արդյունավետ կառավարում: Ներկա պահին մենք ունենք ջրի 80 տոկոս կորուստ»:
Ավելին, նրա խոսքերով, պատասխանատուները ոչ թե իրենք են այս դեպքում, այլ համատիրությունները, քանի որ իրենք, սպառողների հետ կնքած պայմանագրի համաձայն, պատասխանատու են բնակարանում իրականացվող ջրամատակարարման համար, իսկ բնակարանից դուրս խնդիրները արդեն համատիրությունն է կարգավորում:
«Եթե ջրի կորուստը հաջողվեց նվազեցնել, ապա սակագները ևս կնվազեցվեն»,- ասաց Մարգարյանը:
