Լարսի անցակետը շարունակում է փակ մնալ, սակայն այնտեղ հայկական բեռնատարների կուտակումներ չկան: Ինչպես «Առաջին լրատվական»-ի հետ զրույցում հայտնեց Հայաստանի միջազգային փոխադրողների ասոցիացիայի քարտուղար Հերբերտ Համբարձումյանը, ամանորյա տոներից հետո բեռնափոխադրումը դեռ չի ակտիվացել: Նշելով, որ բեռների հոսքը կսկսվի հաջորդ շաբաթվանից՝ Հ. Համբարձումյանը հույս հայտնեց, որ այդ ժամանակ արդեն ճանապարհը մաքրված և անցանելի կլինի:
Անդրադառնալով հունվարի 17-ին Վրաստանի վարչապետ Բիձինա Իվանիշվիլիի Հայաստան կատարելիք այցին՝ ասոցիացիայի քարտուղարը հայտնեց, որ տրանսպորտի նախարարություն է դիմել Լարսի անցակետի հետ կապված՝ խիստ կարևորելով այդ խնդրի լուծումը: Նրա խոսքով՝ ՀՀ-ն Ռուսաստանի հետ կապող միակ ճանապարհն է, և պետք է տարբերակ գտնել, որ խցանումներ չառաջանան:
Ի դեպ, Վրաստանում ոստիկանության վերաբերմունքի և վարվելակերպի փոփոխությունների մասին տարածված լուրերի հետ կապված՝ Հ. Համբարձումյանը նշեց, որ ասոցիացիայի անդամներն առայժմ ոչ մի նոր բարդությունների չեն հանդիպել Վրաստանում:
