«Հայաստան-Թուրքիա Սթարթափ ուիքենդի» շրջանակում Հայաստանում է Օզիեյգին համալսարանի ռեկտոր, պրոֆեսոր, գիտությունների դոկտոր Էրհան Էրկուտը: «Առաջին լրատվականը» թուրք պրոֆեսորին մի քանի հարց ուղղելու հնարավորություն ունեցավ:
-Պարոն Էրկուտ, Դուք Հայաստանում եք՝ մասնակցելու «Հայաստան-Թուրքիա Սթարթափ ուիքենդ»-ին, որի ընթացքում երիտասարդ ձեռներեցները պետք է ներկայացնեն իրենց նախնական գաղափարները, որոնց իրականացումը հնարավոր է նոր տեխնոլոգիաների կիրառմամբ: Ի՞նչ նպատակներով և ի՞նչ պրոդուկտներ տեսնելու ակնկալիքով եք եկել Երևան:
– Սա ի սկզբանե սկսվեց որպես հայ-թուրքական հարաբերությունների կարգավորման գործընթացի մի մաս, այնուամենայնիվ, մենք կարող ենք տեսնել, որ շատ տարբեր սիներգիաներ, միավորումներ ձևավորվեցին բիզնես ոլորտներում երկու երկրների միջև, հետևաբար մենք կարծում ենք, որ ձեռներեցների փոխանակման արդյունքում կարող ենք բավական հետաքրքիր արդյունքներ ունենալ: Սա է իմ ակնկալիքը:
-Դուք երեկ հետաքրքիր առաջարկ եք հնչեցրել՝ ասելով, որ կրթաթոշակներ եք պատրաստ տրամադրել հայ ուսանողներին: Կմանրամասնե՞ք՝ ինչ նկատի ունեիք և ի՞նչ եք առաջարկում հայ ուսանողներին Ձեր ղեկավարած համալսարանում:
-Մենք կրթաթոշակներ ենք տրամադրում աշխարհի տարբեր երկրների ուսանողների, մենք պատրաստ ենք լրացուցիչ կրթաթոշակներ տրամադրել մասնավորապես հայ ուսանողներին, որպեսզի կարողանանք ավելի մեծ թվով ուսանողների ներգրավել Հայաստանից: Ի դեպ, խոսքը ոչ միայն ուսանողների մասին է: Ձեռներեցներին կարող ենք տրամադրել կրթաթոշակներ, որպեսզի նրանք գան և աշխատեն մեր ինկուբատորում:
-Նման շփումներն, ըստ Ձեզ, նպաստո՞ւմ են արդյոք հայ-թուրքական հարաբերությունների կարգավորմանը:
-Այս ամենը տնտեսության մասին է: Պատկերացրեք, որ այս ողջ տարածաշրջանը, մասնավորապես Մերձավոր Արևելքը, հոգնել է պատերազմելուց, և մենք կարծում ենք, որ ժամանակն է բարելավենք տարածաշրջանի տնտեսական վիճակը և բարեկեցություն ապահովենք մարդկանց համար: Պատկերացրեք մի տնտեսական միություն՝ Եվրոպական միության նման, որտեղ կմիավորվեն Բալկանյան երկրները, Մերձավոր Արևելքի երկրներն ու Կովկասյան երկրները, և անհրաժեշտություն էլ չի լինի, որ մեզ որևէ մեկը՝ ամերիկացիները կամ եվրոպացիները, օգնեն այս գործում, որովհետև հսկայական տնտեսական ներուժ կա մեզ մոտ, և մենք ինքներս կարող ենք դա իրացնել:
-Պարոն Էրկուտ, Դուք խոսում եք տարածաշրջանի խոր տնտեսական ինտեգրման մասին այնպիսի պայմաններում, երբ հայ-թուրքական սահմանները փակ են: Ինչպե՞ս եք այդ դեպքում գնահատում այն փաստը, որ հայ-թուրքական սահմանները դեռ փակ են, և այս ուղղությամբ Թուրքիայի իշխանությունները որևէ նախաձեռնություն չեն իրականացնում:
-Ես, իհարկե, քաղաքական գործիչ չեմ, և նրանց փոխարեն չեմ կարող խոսել: Բայց ես հավատում եմ պարզ մարդկանց ուժին, մարդիկ սկսում են իրար հասկանալ, երբ սկսում են գիտակցել, որ ունեն ընդհանուր հետաքրքրություններ: Հույս կա, որ մեր ձայները լսելի կդառնան քաղաքական գործիչների համար, և նրանք կսկսեն գործել բոլորի շահերից ելնելով:
