«Ժառանգության» նախաձեռնած հանդիպմանն անդրադառնալով` տնտեսագետ Անդրանիկ Թևանյանը նախ չբացառեց, որ այս հանդիպումների արդյունքում նոր քաղաքական ուժ ձևավորեն:
«Պրոցեսը ցույց կտա` իրենց հանդիպումները կվերածվե՞ն արդյոք նոր քաղաքական ուժի, թե՞ ոչ: Բայց այլընտրանքային նոր ուժ ստեղծելու մասին ես արդեն երկու տարի է` խոսում եմ: Եվ եթե նման պրոցեսներ լինեն, ինքս մասնակից ու աջակից կլինեմ դրան»,- ասաց նա` հավելելով, որ կոնկրետ շաբաթ օրը իրենք նման հարց դեռ չեն քննարկել:
Մեր դիտարկմանը, թե մշտապես քննադատելով Լևոն Տեր-Պետրոսյանին` այսօր Թևանյանը մի սեղանի շուրջ է նստում նրա կողմնակիցների հետ, ավելին` չի բացառում այդ մարդկանց հետ բևեռ ձևավորելը, վերջինս արձագանքեց.
«Կուզենայի տարանջատել Հայ ազգային կոնգրեսն ու Լևոն Տեր-Պետրոսյանին: Նա միանձնյա որոշումներ կայացնող է, և դա նյարդայնացնում է, դուր չի գալիս Կոնգրեսի տարբեր կազմակերպությունների ու մարդկանց, և ես որևէ խնդիր չեմ տեսնում, որ հետագայում եթե ինչ-որ ֆորմատներ ձևավորվեն, ապա Կոնգրեսից ինչ-որ մարդիկ լինեն այնտեղ:
Ավելին` ես կցանկանայի, որ այդպես լինի, քանի որ Կոնգրեսն ինձ համար Լևոն Տեր-Պետրոսյանը չէ, այլ այն մարդիկ, որոնք դժգոհ են ստեղծված իրավիճակից ու ցանկանում են իրական փոփոխություններ»: