Երևանի «Արարատ»-ի գլխավոր մարզիչ Աբրահամ Խաշմանյանը 2012 թվականը գնահատում է բավարար և կարծում է, որ լուրջ համալրում ստանալու դեպքում իր թիմը կարող է լուրջ բարձունքներ նվաճել: Այդ մասին մասնագետն ասաց 1in.am Sport-ի հետ զրույցում.
«Տարին բավարար եմ գնահատում: Կային խաղեր, որտեղ «Արարատ»-ը կարող էր չպարտվել, բայց մենք արեցինք անհնարինը: Կային իրավիճակներ, երբ թվում էր, թե դրանցից դուրս գալու հնարավորություն չկա, բայց մենք պատվով դուրս եկանք:
Կարծում եմ, որ մեր հավաքականը մեծ պոտենցիալ ունի և կարող է ավելի լավ հանդես գալ: Ֆուտբոլիստների պոտենցիալը թույլ է տալիս մտածել, որ մենք կարող ենք ավելի զորեղ լինել: Ազգային թիմի համար ևս տարին բավարար կգնահատեմ:
Տարին նաև Օլիմպիական էր: Սպասելիքները մեծ էին: կարծում եմ, նորմալ էին ելույթները: Ինձ համար անհասկանալի է, թե ինչպես Հենրիխ Մխիթարյանը չի հայտնվում լավագույն մարզիկների տասնյակում: Ես Հենրիխին կդնեմ առաջին տեղում, անկախ նրանից, որ Ջուլֆալակյանը շատ լավ ելույթ ունեցավ: Մյուս մարզիկներն բավականին մեծ տարածությունով կդնեի երկրորդ, երրորդ և մյուս տեղերում, այդ թվում և նույն Ջուլֆալակյանին:
Մեր շախմատիստները Ստամբուլում Հայաստանի դրոշ են բարձրացրել, նրանք մեր ազգի փառք ու պատիվն են: Նրանց ևս կարելի էր դնել Հենրիխի կողքին: Ճիշտ է, ես Հենրիխին առանձնացնում եմ, որոհետև ֆուտբոլը շատ մեծ մասսակայականություն վայելող մարզաձև է աշխարհում: Մի շարք ազգեր ճանաչում են ձեռք բերում իրենց ֆուտբոլիստներով: Նա արժանի է առաջինը լինելուն: Երկրորդը կարող էր լինել Ջուլֆալակյանը, կամ Արոնյանը, ով մեծ փառք ու պատիվ է բերել մեր ազգին:
«Արարատ»-ը խիստ համալրման կարիք ունի: Մեր տղաներն արել են անհնարինը: Ունենք երկու համալում ընդամենը, բայց պետք է ունենանք յոթ, ութ նորեկներ, որպեսզի կարողանանք ավելի լավ արդյունքների հասնել: Ես շնորհակալ եմ թիմի ներկայիս ֆուտբոլիստներին, քանի որ նրանք արել են առավելագույնը:
Թիմին են միացել Նորայր Գրիգորյանն ու Հովհաննես Գրիգորյանը, որոնք միացել են «Ուլիս»-ից:
Նախատեսված է երկու ուսումնամարզական հավաք: Մեկը կանցնի հունվար ամսին, հավանաբար, Ծաղկաձորում: Կլինի տասնօրյա հավաք: Իսկ երկրորդը նախատեսված է փետրվարին, և կլինի Եվրոպայում: Հավանաբար կտևի երկու շաբաթ:
Մենք շեշտը դրել ենք գավաթի նվաճման վրա, սակայն եթե կարողանանք լուրջ համալրում ստանալ, 2013/14թթ մրցաշրջանում կկարողանանք պայքարել չեմպիոնության համար:
Ամանորը դիմավորելու եմ տանը: Շնորհավորում եմ բոլորի Ամանորն ու Սուրբ Ծնունդը, բոլորին մաղթում եմ առողջություն, մարզիկները խուսափեն վնասվածքներից, ունենան նվաճումներ և մեդալներ բերեն մեր ազգին»:
