Հեռուստահաղորդավարուհի, ասմունքող, Cosmopolitan-Հայաստան ամսագրի խմբագիր Հրաչուհի Ութմազյանը 2012-ը լավ տարի է համարում և նշում է, որ առհասարակ յուրաքանչյուր տարվանից էլ շնորհակալ է, քանի որ յուրաքանչյուր տարի իր չափով և իր ձևով ինչ-որ բան տալիս է բոլորին:
Նա նշեց, որ 2012-ն աշխատանքային առումով բուռն տարի էր իր համար, մեծ նախագծեր են կարողացել իրականացնել, մասնավորապես՝ Cosmopolitan-Հայաստանում: Բացի այդ, այս տարի ATV-ով Cosmic Show նոր նախագիծ են իրականացրել:
«Cosmopolitan-ի հեռուստատեսային տարբերակով կփորձենք օգնել աղջիկներին գտնել իրենց հարցերի պատասխանները այս կամ այն խնդրի շուրջ, այնպես որ կարող եմ ասել, որ գոհ եմ այս տարվանից և վստահ եմ, որ 2013-ին էլի շատ անելիքներ ունենք: Երևի թե միակ բանը, որ կուզեի, որ բոլորն առողջ լինեն, որովհետև սա միակ բանն է, որ մեզանից չէ կախված, իսկ մնացածն ինքներս կանենք, և մնացածը ինքներս կկարողանանք ձեռք բերել»,- հավելեց Հրաչուհի Ութմազյանը:
Նա նաև նշեց, որ 2013-ի ծրագրերի մասին չի շտապում խոսել. «Մենք անում ենք, հետո նոր ամփոփում տարին, ասում՝ ինչ ենք արել։ Այնպես որ կասեմ միայն, որ ծրագրերը շատ են, բուռն են, այնպես, ինչպես սովոր է աշխատել Cosmopolitan-Հայաստանը»:
