Լոնդոնցի նկարիչ ու լուսանկարիչ Մեթյու Սթոունն (Matthew Stone) իր նկարներում, կոլաժներում ու քանդակներում գովերգում է մարդկային մերկ մարմնի գեղեցկությունն ու ներդաշնակությունը։ Որոշ քննադատներ համարում են, որ նրա լուսանկարչական փնտրտուքներն ավելի շատ բնապատկերներ են հիշեցնում՝ այնքան արտասովոր ու գեղարվեստական են նրա բնորդների ռակուրսները։
Սթոունի առաջին անհատական ցուցահանդեսը կայացել է 2007 թվականին՝ նկարչի հարազատ Լոնդոնում։ Այն ժամանակ UNION պատկերասրահում առաջին անգամ ներկայացվեցին նրա աշխատանքները՝ Futurehindsight ընդհանուր անվամբ։ 2009-ի նոյեմբերին նա Sunday Times պարբերականի վարկածով համարվեց ամենաազդեցիկներից՝ մինչև երեսուն տարեկան երիտասարդ նկարիչների շրջանում։
Սթոունը ծնվել է 1982թ.՝ Լոնդոնում։ 2004-ին ավարտել է Camberwell College of Arts դիզայնի և արվեստների բրիտանական դպրոցը։ Ներկայում աշխատում է !WOWOW! ստեղծագործական միավորումում։ Նկարիչը շատ ժամանակ է տրամադրում լուսանկարչությանը, բեմադրում ներկայացումներ, նկարահանում տեսաֆիլմեր։ Մերկ բնորդը, որի պատկերմամբ այդպես հրապուրված է Սթոունը, նրա աշխատանքներում ձեռք է բերում բոլորովին այլ հնչեղություն։ Թվում է, թե նրա լուսանկարներում պատկերված մարդիկ կերպարանափոխվում են այլմոլորակային էակների՝ բազմաչափ, խորհրդավոր, կյանքով լեցուն։
