ՀՀ պետբյուջեով նախատեսված էր ընթացիկ տարում հավաքել 100 միլիարդ դրամ ավել հարկ: ՊԵԿ նախագահի տեղակալ Արմեն Ալավերդյանը «Արմնյուզ» հեռուստաընկերության «Բանաձև» հաղորդման եթերում ասել է, որ համակարգն իր առջև դրված խնդիրը պատվով կատարեց, երեք հիմնական գործոնի հաշվին. «Տնտեսական աճով պայմանավորված գործոններ՝ փոխարժեք, տնտեսական աճ, առանձին ճյուղերի զարգացում. երկրորդը՝ հարկային, մաքսային վարչարարության զարգացումն է, և երրորդը՝ օրենսդրական փոփոխություններ, որոնք նախորդ տարի տեղի ունեցան և գործի դրվեցին 2012-ի ընթացքում»:
«Լրացուցիչ յուրաքանչյուր դրամ հավաքագրումը, ըստ նրա, մասնագիտական վեճերի, հաճախ դատական քաշքշուկների թեմա է դարձել»,– ասել է ՊԵԿ նախագահն ու եզրակացրել. «Խոշոր բիզնեսի հետ ավելի դժվար է աշխատել, որովհետև ունեն գրագետ հաշվապահներ»: Եկամուտների 58 տոկոսն ապահովվել է խոշոր բիզնեսի հաշվին, մնացած մասը՝ միջին: Փորձել են հնարավորինս չնեղացնել հարկատուներին:
Հաջորդ բարեփոխումը ՊԵԿ փոխնախարարը համարել է հարկային տեսչությունների թվի կրճատումը. «Կար 53 հարկային տեսչություն. այսօր կիսով չափ կրճատվել են, ունենք 27-ը: Կրճատել ենք այդ ստուգող բաժինների քանակը, միացրել ենք իրար, և միայն 12 թվականին շուրջ 257 աշխատող կա՛մ ազատվել են, կա՛մ տեղափոխվել այլ աշխատանքի»:
Հաջորդ տարի հարկային բեռը մեծանալու է 110 միլիարդ դրամի չափով, որի միայն 31 միլիարդը կհավաքագրվի օրենսդրական փոփոխությունների հաշվին, մնացածը՝ վարչարարության:
ՊԵԿ փոխնախագահն ամենակարևոր փոփոխություններից է համարում էլեկտրոնային հաշվետվությունների անցումը, որն ավարտուն տեսք կստանա փետրվարին: Նա նաև նշել է, որ աշխատանքներ են տարվում «Հայփոստի» բաժանմունքների միջոցով հաշվետվություններ ընդունելու ուղղությամբ, ինչպես նաև ձգտում են հասնել նրան, որ հարկ վճարողը դա անի իր գրասենյակից՝ ինտերնետով:
Արմեն Ալավերդյանը նաև նշել է, որ հարկ վճարողների տարբեր խմբերի մեջ տարբերակված մոտեցումներ են կիրառվելու՝ բարեխիղճ և անբարեխիղճ: Դրանց չափանիշներ կսահմանվեն, և «բարեխիղճները» կարող են գրանցվել ՊԵԿ կայքում ու ազատվել բազմաթիվ ստուգումներից, վարչարարությունից: Նրանց նկատմամբ կկիրառվի մեղմ վարչարարություն:
