Սերբիայի ԱԳՆ-ը դեմարշ է հայտարարել Ալբանիային երեքշաբթի երեկոյան Բելգրադում 2 երկրների ֆուտբոլի հավաքականների հանդիպման ժամանակ պատահածի պատճառով: Այս մասին հայտնում է BBC-ի ռուսական ծառայությունը՝ հղում անելով Սերբիայի ԱԳՆ-ին:
«Բելգրադում Ալբանիայի Հանրապետության դեսպան Իլիր Բոչկիին Սերբիայի Հանրապետության ԱԳՆ-ում կտրուկ դեմարշ է փոխանցվել ալբանական մեծ պրովոկացիայի հետ կապված»,- հայտնում է ԱԳՆ-ը:
Եվրոպայի առաջնության ընտրական խաղի առաջին խաղակեսի 41-րդ րոպեին 0:0 հաշվի ժամանակ «Պարտիզան» մարզադաշտի տրիբունայից ալբանական դրոշով ռադիոկառավարվող ուղղաթիռ է արձակվել, որը պատռել են Սերբիայի հավաքականի խաղացողները:
Ծեծկռտուք է սկսվել, ինչից հետո հանդիպման գլխավոր մրցավարը թիմերին դուրս է հանել խաղադաշտից, իսկ Եվրոպական ֆուտբոլային ասոցիացիաների միության ներկայացուցիչները որոշում են ընդունել չվերսկսել խաղը:
Սերբիայի ՆԳՆ-ում հայտնել են, որ ուղղաթիռը, որին ամրացված է եղել այսպես կոչված՝ Մեծ Ալբանիայի դրոշը, կառավարել է Ալբանիայի վարչապետի եղբայրը, որին ձերբակալել են:
