«Դուպլեքս» ակումբում ԱԺ «Ժառանգություն» խմբակցության պատգամավոր Արմեն Մարտիրոսյանը դժգոհեց այսօր ստեղծված իրավիճակից, որ թաց ու չոր խառնվել են իրար, ու գնդով ցեխ է շպրտվում «Ժառանգություն» կուսակցության և այն ուժերի վրա, որոնք ցանկանում են անկախ լինել և երկրում ստեղծել ժողովրդավարական համակարգ: Արմեն Մարտիրոսյանը ասաց, որ մոնոպոլիաները ոչ միայն երկրի տնտեսական, այլև արդեն քաղաքական համակարգում են արմատավորվել: «Հայաստանի համար մեծ շքեղություն է մոնոպոլ համակարգը»,-ասաց Մարտիրոսյանը:
Աժ ՀՀԿ խմբակցությունից Մանվել Բադեյանն էլ ասաց, որ իրենց համար անհասկանալի են «Ժառանգության» նման պահվածքն ու պահանջները: Ըստ Բադեյանի՝ «Ժառանգությունը» հաջորդ ընտրություններում խորհրդարանում հայտնվելու շանս չունի և հիմիկվանից նման բուռն ակցիաների է դիմում: Նա սխալ համարեց Րաֆֆի Հովհաննիսյանի հացադուլը:
Ի դեպ, Մանվել Բադեյանը, խոսելով կոալիցիոն վերջին հայտնի համաձայնագրի մասին, ասաց. «Ինչ է եղել, երկու քաղաքական ուժեր ստորագրել են համագործակցության մասին…,- լրագրողների զարմացած հայացքին ի պատասխան ճշտեց,- լավ թող լինի՝ երեք ուժ»: Ակնհայտ էր, որ Բադեյանը ՕԵԿ-ին հաշվի չէր առել:
