ԱՄՆ-ի Կոնգրեսի Ներկայացուցիչների պալատը հաստատել է 2013 թ. ռազմական ծախսերի մասին օրինագիծը: Ինչպես հաղորդում է ITAR-TASS-ը, օրինագիծը նախատեսում է ռազմական ծախսերիհամար հատկացնել 633 միլիարդ, ինչը 1.7 միլիարդ դոլարով ավելի շատ է, քան խնդրել էր ԱՄՆ-ի վարչակազմը:
Փաստաթղթի համաձայն՝ 528 միլիարդ դոլար հատկացվելու է Պետագոնի կարիքների, 17 միլիարդ դոլարը՝ էներգետիկայի նախարարության ռազմական ծրագրերի , իսկ 89 միլիարդ դոլարը՝ արտերկրում, այդ թվում՝ Աֆղանստանում ռազմական գործողություններ անցկացնելու համար:
Օրինագիծը նախատեսում է Աֆղանստանից դուրս բերել ԱՄՆ-ի զորքերը, ստեղծել նոր տեսակի զինամթերքներ և 1.7%-ով բարձրացնել զինվորականների աշխատավարձները:
Փաստաթուղթը պարունակում է մի շարք ուղղումներ, որոնցից մեկն արգելում է Պենտագոնին համագործակցել «Ռոսոբորնէքսպորտ»-ի հետ այն կապակցությամբ, որ Ռուսաստանը զենք է մատակարարում Սիրիային: Մեկ այլ ուղղում պահանջում է, որպեսզի պաշտպանության նախարարությունը Կոնգերսին հայտնի, թե արդյոք ԱՄՆ-ը կարո՞ղ է Սիրիայում թռիչքազերծ գոտի հաստատել, և Պենտագոնին պարտավորեցնում է օրենսդիրներին ներկայացնել Դամասկոսում գործող վարչակարգի հանդեպ հավանական գործողությունների տարբերակներ:
Օրենսդրության որոշ դրույթներ առաջացրել են Սպիտակ տան դժգոհությունը, որը նախազգուշացրել է, որ Օբաման կարող է օգտվել վետոյի իրավունքից: Նախագահին նախևառաջ դուր չի եկել օրինագծի որոշումը, որի համաձայն՝ սահմանափակվելու է ԱՄՆ-ի հատուկ բանտերում, այդ թվում՝ Գուանտանամոյի բազայում ահաբեկչության մեջ կասկածվող անձանց պահելու իր իրավունքը: Օբաման դժգոհ է մնացել նաև Իրանի հանդեպ հավելյալ պատժամիջոցներ սահմանելու փորձից:
Հաջորդ քայլը Սենատում քվեարկությունն է, որից հետո օրինագիծը կփոխանցվի նախագահի հաստատմանը: