Երկրում տիրող սոցիալ-տնտեսական և ներքաղաքական իրավիճակի մասին այսօր բանավիճում էին «Ժառանգություն» խմբակցության պատգամավոր Անահիտ Բախշյանը և ՀՀԿ խմբակցությունից Կարինե Աճեմյանը:
Աճեմյանը նշեց, որ Սերժ Սարգսյանի նախընտրական ծրագրում նշված բոլոր դրույթները կյանքի են կոչվում: Հարցին, թե արդյոք նախընտրական ծրագրի մեջ մտնո՞ւմ է գյուղերը դատարկելը, Աճեմյանը պատասխանեց.
«Ոչ, նման բան չի մտնում նախագահի նախընտրական ծրագրում: Ես ընդունում եմ, որ մենք առաջ ենք գնում դանդաղ քայլերով: Պետք չէ 19 տարվա խնդիրները բարդել 3 տարվա նախագահի վրա: Գործող նախագահը հետևողական է»:
Անահիտ Բախշյանը արձագանքեց, թե Սերժ Սարգսյանից առաջ էլ Ռոբերտ Քոչարյանն էր նախագահ, և «ՀՀԿ նրան ևս աստվածացնում էր»։
«Դուք էլ Սերժ Սարգսյանին եք աստվածացնում»,- միջամտեց Աճեմյանը և հիշեցրեց. «Րաֆֆի Հովհաննիսյանը ինքն էր հայտարարում, որ Սերժ Սարգսյանը կամ էլ Աստված կստիպի իրեն վերանայել հացադուլի որոշումը: Փաստորեն, նա հավասարություն է դրել Աստծո և Սերժ Սարգսյանի միջև»: