Թուրքական Radikal թերթի փոխանցմամբ, Ստամբուլի 3-րդ քաղաքացիական դատարանը բավարարել է ժամանակին Հրանտ Դինքի դեմ ակտիվ գործունեություն ծավալած տխրահռչակ իրավաբան, «Էրգենեքոնի» գործով կասկածյալ Քեմալ Քերինչսիզի և սպանված թուրք զինվորների 5 հարազատների կողմից ներկայացրած դատական հայցն ընդդեմ Նոբելյան գրականության դափնեկիր Օրհան Փամուքի:
Թուրքական դատարանի որոշմամբ, Փամուքը, «թուրք ազգին մեղադրանք ներկայացնելու» և «անհատի իրավունքները ոտնահարելու համար», պետք է վճարի 6000 թուրքական լիրա (4000 ամերիկյան դոլար) փոխհատուցում:
Նշվում է, որ 2005 թվականին շվեյցարական հանդեսներից մեկին տված հարցազրույցում Օրհան Փամուքը նշել էր. «Այս հողում սպանվել է 1 միլիոն հայ ու 30.000 քուրդ, և ոչ ոք չի համարձակվում այդ մասին խոսել»:
Հիշեցնենք, որ մեկ ամիս առաջ հունական Kathimerini պարբերականին տված հարցազրույցում Փամուքը վերահաստատել էր իր վերոնշյալ խոսքերը:
