Գեղարքունիքի մարզի Դարանակ գյուղում նախընտրական եռուն գարուն է սկսել։
Այստեղ նախորդ` կեղծված ընտրությունների արդյունքում, Սերժ Սարգսյանը արտահերթ ընտրություններ անցկացնելու հրահանգ տվեց, և այժմ նախընտրական նոր փուլում ընտրակաշառքները ռեկորդային թվերի են հասնում։
Ինչպես տեղեկացրել էինք, գյուղապետի պաշտոնի համար միմյանց դեմ մրցակցում են երկու հանրապետական թեկնածու` գործող գյուղապետ Վլադիմիր Սարկիսյանը և Վահան Մարգարյանը, վերջինիս օգտին աշխատում է ԱԺ հանրապետական պատգամավոր Սպարտակ Մելիքյանը, ով գումարներ է ուղարկել գյուղ` ձայներ գնելու համար։ Իսկ մի ձայնի ինքնարժեքը 50 հազար դրամ է։ Բոլորովին վերջերս մի ընտանիք գնացել է այդ գործարքին և 200 հազար դրամ վաստակել 4 ձայնի համար։
«Սպարտակ Մելիքյանը ընտրություններից առաջ գյուղում կաշառք է բաժանում։ Սպարտակ Մելիքյանի վստահված անձերը գիշերը մտել են տնետուն` ահ տալով ստիպել գումար վերցնեն Վահան Մարգարյանի օգտին ձայն տալու համար։ Չեմ հասկանում, թե դրանք ինչ օգուտ ունեն մարդուց, որ այդքան գումար են բաժանում։ Բայց մի բան հստակ հասկանում եմ, որ այդքանն անողը վնաս էլ կտա մարդուն»,- մեզ հետ զրույցում նկատեց Դարանակի գյուղապետի անկուսակցական թեկնածու Գյուլնազ Գրիգորյանը և ավելացրեց, որ իր ընտրողներին նման առաջարկ են արել, որից նրանք պատվով հրաժարվել են։
Ավելին` նույն թիմը այն դարանակցիներին, ումից անցյալ ընտրություններին ձայն են գնել, հիշեցրել է, որ նրանց ձայների համար 300 դոլար են տվել, հետևաբար ստիպել են, որ կա՛մ հերթական անգամ ձայնը Վահանին տան, կա՛մ 300 դոլարը վերադարձնեն, որը արդեն մարդիկ ծախսել են։
«Ես նման կաշառքներ չեմ կարող տալ, որովհետև 20 դրամ էլ չունեմ։ Բացի դա, վաղը այդ գումարներն իմ գյուղի վրայից պետք է պոկեմ, որ տակից դուրս գամ»։
