Կիպրոսին դեֆոլտ է սպառնում, եթե այն մոտ ժամանակներս չապահովի իր ծախսերի ֆինանսավորումը՝ հայտարարել է երկրի ֆինանսների նախարար Քրիստոս Պացալադիսը:
«Մենք «եռյակի» (ԵՄ, Եվրոպական կենտրոնական բանկ, ԱՄՀ) հետ քննարկել ենք 7.8 մլրդ եվրոյով բանկերի աջակցման հարցը: Բացի այդ, պետության ընթացիկ պահանջմունքների համար, որը մոտ 200-300 մլն եվրո է կազմում, որոշ միջոցներ պետք է ստացվեն կիսապետական ընկերություններից»,- նրա խոսքերն է մեջբերում RIA Novosti-ն:
Կառավարությունը 100 մլն եվրոյի չափով վարկ է պահանջում Cyta հեռահաղորդակցական ընկերությունից, էլեկտրական մենաշնորհային ընկերությունից և երկրի նավահանգիստների կառավարման վարչությունից: Դեռևս ամբողջ ծավալով վարկը տրամադրել համաձայնել է միայն Cyta-ն, մինչդեռ նավահանգիստները պատրաստ են տալ միայն 34 միլիոն եվրո:
Պացալադիսի խոսքով՝ եթե պետական ընկերությունները համաձայնեն ֆինանսավորել բյուջեն, երկրին տեխնիկական դեֆոլտ կսպառնա:
Հիշեցնենք, որ Կիպրոսը վարկային աջակցության խնդրանքով դիմել է ԵՄ-ին և ԱՄՀ-ին, սակայն վարկատուների հետ համաձայնությունը սպասվում է հունվարի երկրորդ կեսից ոչ շուտ, և կղզային պետությունը փնտրում է ֆինանսավորման այլ աղբյուրներ: Ինչպես սպասվում է, վարկային փաթեթի ծավալը կարող է մինչև 17.5 մլրդ եվրո կազմել, ինչը համեմատելի է Կիպրոսի ՀՆԱ-ի հետ:
