Հայաստանն ու Վրաստանը չպետք է տրվեն Ռուսաստան-Արևմուտք հակամարտության հոսանքին և վատթարացնեն հարաբերությունները: «Առաջին լրատվական»-ի հետ զրույցում նման տեսակետ հայտնեց Վրաստանի դիվանագիտական ակադեմիայի ռեկտոր, քաղաքագետ Սոսո Ցինցաձեն:
Նա նախ անդրադարձավ Ուելսում վերջերս կայացած ՆԱՏՕ-ի երկօրյա գագաթնաժողովի արդյունքներին, ասելով, որ Վրաստանը ստացավ այն, ինչ ցանկանում էր: Ցինցաձեն ասաց, որ հակված չէ այս կամ այն կերպ չափազանցնել կամ նսեմացնել այդ գագաթնաժողովի արդյունքները: Ըստ նրա՝ Վրաստանն ինչպես եղել է անպաշտպան, այնպես էլ մնացել է անպաշտպան:
« Իմ կարծիքը հետևյալն է, որ Վրաստանը, ելնելով ներկայիս աշխարհաքաղաքական իրողություններից, քիչ հավանական է, որ մոտ ապագայում դառնա ՆԱՏՕ-ի լիիրավ անդամ, բայց դա մի գործընթաց է, որը կարող է ձգձգվել տարիներով, տասնյակ տարիներով միգուցե: Ներկայումս ամեն ինչ կախված է նրանից, թե ինչպես կզարգանան Ռուսաստան-Արևմուտք հարաբերությունները: Որևէ աղմկահարույց որոշում կամ բեկում տեղի չի ունեցել և պետք էլ չէր սպասել Վրաստանի համար Ուելսից: Կարևոր եզրակացությունը, որն արեցինք գագաթնաժողովից հետո, այն էր, որ Արևելյան Եվրոպայի և Բալթյան երկրները կարող են հույս ունենալ, որ կավելանա իրենց պաշտպանությունն ու հետևաբար նաև անվտանգությունը»,- նշեց նա: Ապա անդրադառնալով ՆԱՏՕ-ի առաջարկին՝ Վրաստանին տրամադրել ռազմատեխնիկական ուսումնական կենտրոն` նկատեց, որ այդ քայլով ՆԱՏՕ-ն փորձում է հակակշռել Ռուսաստանի ռազմական ներկայությանը Հայաստանում` պայմանավորված Ռուսաստան-Արևմուտք լարված հարաբերություններով: «Ուսումնական կենտրոնը նախատեսվում է Վրաստանի Մցխեթի շրջանի Վազիանի գյուղում, որտեղ նախկինում տեղակայված է եղել ռուսական ռազմական բազա, սա պատահական չէ ընտրված, ռազմավարական նշանակություն ունեցող մի վայր է: Այդ ուսումնական հաստատությունը դեռ գոյություն չունի և որևէ մեկը չգիտի, թե ինչ ձևաչափ է դա, ինչ մասշտաբներ են նախատեսվում և ոչ էլ կառուցվածքին են տեղյակ: Այդ առաջարկը դեռ թղթի վրա է, ուստի դժվար է խոսել, թե դա ինչ մարտահրավերներ կբերի տարածաշրջան, քանի որ Ռուսաստանի համար սա նվեր չէ, իհարկե, յուրաքանչյուր քայլ ընդառաջ Արևմուտքին Ռուսաստանի համար տհաճություններ են, բայց ես չեմ կարծում, թե Ռուսաստանը դա կընդունի լուրջ մարտահրավեր: Կտեսնենք»,- ասաց Ցինցաձեն:
Վերջինս այս իրավիճակում կարևորեց, որ Արևմուտք-Ռուսաստան հակամարտությունը չդառնա հայ-վրացական հակամարտություն և ինչ-որ կերպ անդրադառնա հայ-վրացական հարաբերությունների վրա: «Ես կարծում եմ, որ պաշտոնական Երևանն ու պաշտոնական Թբիլիսին համարժեք են գնահատում ստեղծված աշխարհաքաղաքական իրադրությունը, ղեկավարությունները սկզբունքորեն շարժվում են ոչ թե համերաշխության սկզբունքով, այլ սեփական ազգային շահերով, ուստի այս իմաստով և Երևանը, և Թբիլիսին կարողանում են իրենց շահը, այսինքն՝ հայ-վրացական բարեկամական հարաբերությունները պահպանել»,- ասաց Սոսո Ցինցաձեն:
