G7-ի անդամ երկրները խորհրդակցություններ են անցկացնում՝ Նյու Յորքում ՄԱԿ-ի Գլխավոր ասամբլեայի 69-րդ նստաշրջանի շրջանակում սեպտեմբերի վերջին արտգործնախարարների հանդիպում անցկացնելու վերաբերյալ: Այս մասին հայտնում է ճապոնական «Կիոդո» գործակալությունը՝ հղում անելով կառավարական աղբյուրներին:
Հանդիպման ընթացքում կհստակեցվեն երկրների դիրքորոշումներն Ուկրաինայում ձեռք բերված հրադադարի հարցով: Ինչպես հայտնում է գործակալությունը, արտգործնախարարները կփորձեն խրախուսել Ռուսաստանին՝ դրսևորելու իր ազդեցությունը տևական հրադադարի կյանքի կոչման և խաղաղության ձեռք բերման համար:
Բացի այդ, կքննարկվի Իրաքում տիրող իրավիճակը՝ կապված «Իսլամական պետության» ազդեցության գոտու ընդլայնման հետ:
Ինչպես հայտնում է գործակալությունը, G7-ի երկրների առաջնորդների հանդիպումն ըստ ամենայնի չի կայանա Նյու Յորքում՝ նրանց հագեցած գրաֆիկների պատճառով:
Նշենք, որ ՄԱԿ-ի Գլխավոր ասամբլեայի 69-րդ նստաշրջանը կանցկացվի սեպտեմբերի 21-30-ը:
