«Առաջին լրատվական»-ի տեղեկություններով՝ օրերս հանդիպել են Սահմանադրական դատարանի նախագահ Գագիկ Հարությունյանն ու ԲՀԿ առաջնորդ Գագիկ Ծառուկյանը: Ընդ որում՝ հանդիպումը եղել է Գագիկ Հարությունյանի նախաձեռնությամբ:
Հանդիպման ժամանակ քննարկման միակ հարցը եղել է առաջիկա Սահմանադրական բարեփոխումների հայեցակարգը, որին, ինչպես հայտնի է, ԲՀԿ-ն դեմ է, և կուսակցության որոշ անդամներ շատ կոշտ են արտահայտվել ՍԴ փոփոխությունների դեմ, մասնավորապես, երկրի կառավարման ձևի փոփոխության շուրջ:
ԲՀԿ-ականները կարծում են, որ երկրում առկա խնդիրները պայմանավորված են ոչ թե Սահմանադրությամբ, այլ դրանում ամրագրված նորմերի կիրառման, կյանքի կոչելու պատրաստակամության բացակայությամբ, այլ կերպ ասած՝ քաղաքական կամքի բացակայությամբ:
Գագիկ Հարությունյան-Գագիկ Ծառուկյան հանդիպման ժամանակ Գագիկ Հարությունյանը փորձ է արել համոզել Ծառուկյանին՝ փոխել իր մոտեցումը ՍԴ փոփոխությունների վերաբերյալ և թույլ տալ, որ Սահմանադրական փոփոխությունների նախագիծը, երբ դրվի քննարկման, անցնի անաղմուկ մթնոլորտում:
Գագիկ Ծառուկյանը, սակայն, անդրդվելի է եղել: Նա հերթական անգամ պնդել է, որ ինքը դեմ է Սահմանադրական փոփոխություններին և պայքարելու է մինչև վերջ, որպեսզի դրանք տեղի չունենան, և հատկապես երկրի կառավարման ձևը փոփոխության չենթարկվի: Խիստ գաղտնի այս հանդիպումը հենց այս մթնոլորտում էլ ավարտվել է:
Առհասարակ, ՍԴ բարեփոխումների մասնագիտական հանձնաժողովի անդամները բավական կազուսային վիճակում են հայտնվել քաղաքական ուժերի հետ քննարկումների մասով: Քաղաքական ուժերի մեծ մասը խուսափում է մասնագիտական հանձնաժողովի հետ առանձին և համատեղ հանդիպում-քննարկումներից, ինչը հանձնաժողովի անդամներին հնարավորություն չի տալիս լիարժեք հասկանալու իրենց ապագա անելիքը և, մասնավորապես, կազմելու բարեփոխումների վերջնական նախագիծը, որը պետք է հաստատվի Սերժ Սարգսյանի կողմից:
ԲՀԿ-ն, ինչպես նշեցինք, դեմ է: ՀԱԿ-ը իր հերթին հայտարարել է, որ Հայաստանին Սահմանադրական բարեփոխումներ պետք չեն, և առհասարակ հրաժարվել է այդուհետ մասնակցել ՍԴ բարեփոխումների հետ կապված որևէ բովանդակային քննարկման: Նույն մոտեցումը որդեգրել է նաև «Ժառանգությունը», և միայն Դաշնակցության մոտեցումն է այս հարցում տարբերվում, որը հայտարարել է, որ իրենք պատրաստ են մասնակցել բոլոր քննարկումներին և այն կարծիքին են, որ ՍԴ փոփոխությունները պետք է միտված լինեն հենց երկրի կառավարման ձևի փոփոխությանը:
