Հաջորդ շաբաթ Ռուսաստանի և Ուկրաինայի նախագահներ Վլադիմիր Պուտինը և Պյոտր Պորոշենկոն կհանդիպեն` երկու ամսվա ընթացքում առաջին անգամ: Այս մասին գրում է The Wall Street Journal-ը` վկայակոչելով երկու երկրների պաշտոնատար անձանց:
«Դիվանագիտական նախաձեռնություն է ձևավորվում, որը Կիևին կարող է ընտրության առջև կանգնեցնել, կամ շարունակել ռազմական գործողություններն ընդդեմ ռուս անջատողականներին, կամ Մոսկվային զիջումներ անել արյունահեղությունը դադարեցնելու համար»,- նշվում է պարբերականում:
Կիևում պաշտոնատար անձինք հայտարարել են, որ օգոստոսի 26-ին Մինսկում կայանալիք հանդիպումը կարող է ուղեցույց հանդիսանալ դեպի խաղաղության ծրագիր, որը կարող է վերջ դնել Արևելյան Ուկրաինայում ապստամբական շարժմանը:
Կիևը ցանկանում է, որպեսզի Ռուսաստանը դադարի զինել անջատողականներին` հայտարարելով, որ բանակցությունների համար նրանք պետք է վայր դնեն զենքը: «Ապստամբները հայտարարում են, որ պատրաստ են բանակցություններին, սակայն զենքը վայր չեն դնի: Նրանք ցանկանում են, որպեսզի Կիևը ճանաչի նրանց անկախությունն Ուկրաինայից»,- հաղորդում է պարբերականը:
Ըստ պարբերականի, Պուտինը չի նահանջում «իր միակ նպատակից`Ուկրաինան Ռուսաստանի ուղեծրում պահելուց»:
Վերլուծաբանների և դիվանագետների կարծիքով,եթե ապստամբներին թույլ տրվի պահել տարածքի մի մասը հրադադարի փոխարեն, ապա Արևելյան Ուկրաինայում կարող է «սառեցված հակամարտություն» առաջանալ, որը Պուտինին թույլ կտա դադարեցնել Կիևի` Արևմուտքի հետ ինտեգրման փորձերը:
