Ռուսաստանի ձկնորսության հարցերով դաշնային գործակալությունը գուղատնտեսության նախարարությանն առաջարկել է հավելել պատժամիջոցները՝ արգելելով ԱՄՆ-ից, ԵՄ-ից, Նորվեգիայից և Կանադայից ձկան պահածոների և վերամշակված ձկնային այլ մթերքների ներմուծումը: Այս մասին գրում է «Իզվեստիա»-ն՝ վկայակոչելով գյուղատնտեսության նախարարի տեղակալ Իլյա Շեստակովին:
«Մենք կարծում ենք, որ նման հնարավորություն կա: Առավել ևս, որ լավ վերամշակված սննդամթերքներ մենք ինքներս ենք արտադրում՝ բացի ոչ մեծ տեսականուց: Ռուսաստանը կարող է ամբողջությամբ փոխարինել ներմուծվող ձկան պահածոները սեփականով»,- ասել է Շեստակովը:
Նա նաև նշել է, որ Ռուսաստանի ձկնորսության դաշնային գործակալությունը և գյուղատնտեսության նախարարությունը կազմակերպել են գների մոնիթորինգ, ինչպես նաև ամեն օր հետևում են իրադրությանը: Բացի այդ, գերատեսչությունները ծրագրում են կառավարությանը մի շարք միջոցներ առաջարկել, այդ թվում՝ խթանել ձկների փոխադրումը Հեռավոր Արևելքից Ռուսաստանի կենտրոնական մաս:
